ជប៉ុន ៖ ដោយយោងតាមការឲ្យដឹងពីក្រសួងដឹកជញ្ជូនរបស់ប្រទេសជប៉ុន ទូរទស្សន៍រដ្ឋ NHK របស់ប្រទេសជប៉ុន បានផ្សាយថា ជើងហោះហើរមួយចំនួន នៅឯអាកាសយានដ្ឋាន Haneda របស់ទីក្រុងតូក្យូ ត្រូវបានពន្យារពេល នៅថ្ងៃសៅរ៍ (ទី១០ ខែមិថុនា) នេះ បន្ទាប់ពីយន្តហោះដឹកអ្នកដំណើរពីរគ្រឿង បានបុកគ្នានៅលើដីក្បែរផ្លូវរត់។

រូបភាពវីដេអូពីកន្លែងកើតហេតុ បានបង្ហាញឲ្យឃើញពីយន្តហោះ Airbus A330 ចំនួន២គ្រឿង បានឈប់នៅក្បែរគ្នា នៅកន្លែងកើតហេតុ មុនពេលយន្តហោះ ដែលជាកម្មសិទ្ធិរបស់ក្រុមហ៊ុនអាកាសចរណ៍ EVA Air របស់កោះតៃវ៉ាន់ ត្រូវបានអូសចេញពីកន្លែងនោះ។

ជាមួយគ្នានេះ ទូរទស្សន៍ NHK បានឲ្យដឹងថា មិនមានអ្នករងរបួសនោះទេ ប៉ុន្តែឧបទ្ទវហេតុនេះ នាំឲ្យមានការបិទផ្លូវរត់​មួយ​ក្នុងចំណោមផ្លូវរត់ចំនួន៤របស់អាកាសយានដ្ឋាន នៅម៉ោងប្រហែល ១១ព្រឹក (ត្រូវនឹងម៉ោង ២:០០ ម៉ោងសកល) តែបន្ទាប់មក ផ្លូវរត់នេះបានបើកដំណើរការឡើងវិញ។

យន្តហោះរបស់ក្រុមហ៊ុនអាកាសចរណ៍ EVA Air របស់កោះតៃវ៉ាន់ និង Thai Airways របស់ប្រទេសថៃ ដែលមាន​ការប៉ទង្គិចគ្នានេះ នឹងត្រូវចេញដំណើរពីទីក្រុងតូក្យូទៅកាន់ទីក្រុងតៃប៉ិ និងទីក្រុងបាងកករៀងៗខ្លួន៕