អតីតប្រធានាធិបតីសហរដ្ឋអាមេរិក លោក Donald Trump បានប្រើប្រាស់ឱកាសបង្ហាញវត្តមានជាសាធារណលើកដំបូង ចាប់តាំងពីការចោទប្រកាន់នៅតុលាការសហព័ន្ធរបស់លោក ដើម្បីបង្កើនការវាយប្រហារលើក្រសួងយុត្តិធម៌ ដោយចោទប្រកាន់ក្រុមរដ្ឋអាជ្ញាដោយគ្មានភស្តុតាងពីបទធ្វើយុទ្ធនាការខាងនយោបាយ ដើម្បីរាំរាំងរូបលោកមិនឲ្យប្រកួតប្រជែងតំណែងសេតវិមាន។

ថ្លែងកាលពីថ្ងៃសៅរ៍ ទី១០ខែមិថុនា នៅសន្និបាតរបស់គណបក្សសាធារណរដ្ឋក្នុងរដ្ឋចចា(Georgia) លោក Trump បានចោទប្រកាន់លោកប្រធានាធិបតីមកពីគណបក្សប្រជាធិបតេយ្យ ពីបទរៀបចំការ​ឲ្យមានការចោទប្រកាន់ព្រហ្មទណ្ឌ ដើម្បីបំផ្លាញយុទ្ធនាការប្រកួតប្រជែងដំណែងប្រធានាធិបតីរបស់​គូប្រជែង​នយោបាយដ៏ធំរបស់ខ្លួន។

មិនមានភស្តុតាងដើម្បីគាំទ្រការចោទប្រកាន់របស់លោក Trump ទេ។ ក្រសួងយុត្តិធម៌ទទូចថា រាល់ការសម្រេចចិត្តស៊ើបអង្កេតរបស់ខ្លួន ត្រូវបានធ្វើឡើងដោយមិនគិតពីនយោបាយបក្សពួកឡើយ ហើយលោក Biden បាននិយាយថា លោកនឹងមិនចូលរួមក្នុងការស៊ើបអង្កេតរបស់លោក Trump នោះទេ។

លោក Trump បានប្រាប់ក្រុមមន្ត្រីគណបក្សក្នុងស្រុកថា ការចោទប្រកាន់គួរឲ្យអស់សំណើច និង​គ្មានមូលដ្ឋានលើខ្ញុំឡើយ ដោយយកក្រសួងយុត្តិធម៌ដែលលោកត្រាំហៅថា ក្រសួងអយុត្តិធម៌​មកធ្វើជាអាវុធរបស់រដ្ឋបាលលោក Biden នឹងចាត់តែងក្នុងចំណោមការរំលោភអំណាច​ដ៏គួរឲ្យរន្ធត់បំផុតក្នុងប្រវត្តិសាស្ត្រប្រទេសរបស់យើង ។

ការអត្ថាធិប្បាយរបស់លោក បានកើតឡើងមួយថ្ងៃបន្ទាប់ពីរដ្ឋអាជ្ញាបានលាតត្រដាង​ការចោទប្រកាន់ចំនួន ៣៧ករណី ប្រឆាំងនឹងរូបលោកដោយចោទប្រកាន់ថា លោកបានគ្រប់គ្រងឯកសារមិនបានល្អ ដែលរួមទាំងឯកសារសម្ងាត់ស្ដីពីសន្តិសុខដ៏រសើបបំផុតមួយចំនួនរបស់ប្រទេសនេះ បន្ទាប់ពីចាកចេញពីសេតវិមានក្នុងឆ្នាំ ២០២១ ៕