រដ្ឋធានី ខាទូម (Khartoum) របស់ប្រទេសស៊ូដង់ មានភាពស្ងប់ស្ងាត់កាលពីព្រឹកថ្ងៃសៅរ៍ ខណៈដែលបទឈប់បាញ់រយៈពេល ២៤ ម៉ោងដែលសម្របសម្រួលដោយសហរដ្ឋអាមេរិក និងអារ៉ាប៊ីសាអ៊ូឌីត បានចូលជាធរមាន ដោយផ្តល់ច្រកសម្រាប់ជំនួយមនុស្សធម៌ និងផ្តល់ឲ្យពេលវេលាសម្រាកជាសាធារណៈ ពីការប្រយុទ្ធគ្នាដ៏ខ្លាំងក្លា។

បទឈប់បាញ់ដ៏ខ្លីនេះ ធ្វើឡើងបន្ទាប់ពីមានការរំលោភបទឈប់បាញ់ជាច្រើនលើករវាងកងទ័ពស៊ូដង់ និងកងកម្លាំងគាំទ្ររហ័សប៉ារ៉ាយោធា (RSF) ដែលការដណ្ដើមអំណាចបានផ្ទុះឡើងជាអំពើហិង្សាកាលពី៨សប្តាហ៍មុន ដែលបង្កឲ្យមានវិបត្តិមនុស្សធម៌។

សហរដ្ឋអាមេរិក និងអារ៉ាប៊ីសាអ៊ូឌីត បាននិយាយថា ពួកគេបានបង្ហាញពីការខកចិត្ត ដូចគ្នាចំពោះការរំលោភសេចក្តីថ្លែងការណ៍មួយដែលបានប្រកាសបទឈប់បាញ់ចុងក្រោយ ហើយពួកគេបានគំរាមពន្យារពេលកិច្ចចរចា ដែលបានបន្តដោយប្រយោល ប្រសិនបើការប្រយុទ្ធនៅតែបន្ត។

ការប្រយុទ្ធគ្នាដែលបានចាប់ផ្តើមកាលពីថ្ងៃទី ១៥ ខែមេសា បានប្រែក្លាយតំបន់ទីប្រជុំជនរួមទាំង រដ្ឋធានីខាទូម និងទីក្រុងជិតខាងរបស់ខ្លួនគឺទីក្រុង Bahri និងទីក្រុង Omdurman ទៅជាតំបន់សង្រ្គាម ហើយបង្កឲ្យមានជម្លោះនៅក្នុងតំបន់ Darfur និង Kordofan របស់ប្រទេសស៊ូដង់រហូតដល់ភាគខាងលិច។

មុនពេលចាប់ផ្តើមបទឈប់បាញ់នៅម៉ោង ៦:០០នាទីម៉ោងក្នុងប្រទេសនេះ ក្រុមអ្នកស្រុកបានរាយការណ៍ពីការបាញ់មីស៊ីល ប្រឆាំងយន្តហោះនៅភាគខាងត្បូងទីក្រុងខាទុំ និងសង្កាត់ Sharg el-Nil ឆ្លងកាត់ទន្លេ នីល (Nile) ដែលបានឃើញការវាយប្រហារតាមអាកាសផងដែរ។ ការប្រយុទ្ធគ្នានេះបានធ្វើឲ្យមនុស្សជាង ១,៩ លាននាក់ផ្លាស់ទីលំនៅ ប្រជាពលរដ្ឋ ប្រមាណ២០ម៉ឺននាក់ ឬច្រើនជាងនេះដែលបានឆ្លងព្រំដែនចូលទៅក្នុងប្រទេសអេហ្ស៊ីប៕