ភ្នំពេញ ៖ សម្ដេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់នៅក្នុងពិធីសម្ពោធដាក់ឲ្យប្រើប្រាស់សមិទ្ធផលនានា នៃកងពលតូចលេខ៧០។

ប្រសាសន៍សំខាន់ៗរបស់សម្ដេចតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន នាយករដ្ឋមន្ត្រី ដែលមានខ្លឹមសារដូចខាងក្រោម៖

សម្ដេចតេជោ ហ៊ុន សែន បានថ្លែងថា រយៈពេល២០ឆ្នាំមកនេះ កងពលតូចលេខ៧០ បានកសាងអគារ និងហេដ្ឋាចរនាសម្ព័ន្ធជាច្រើន ក្នុងនោះក៏បានកសាងនូវកងកម្លាំងដើម្បីថែរក្សា ការពារសុខសន្ដិភាពជូនប្រទេសជាតិ និងប្រជាពលរដ្ឋកម្ពុជាទាំងមូល។

សម្តេចតេជោ ហ៊ុន សែន ប្រកាសបានថ្លែងអំណរគុណដល់នាយទាហាន នាយទាហានរង និងពលទាហាន នៃកងយោធពលខេមរភូមិន្ទទាំងអស់ ដែលបានលះបង់អស់កម្លាំងកាយចិត្ត ក្នុងកិច្ចការពារសុខសន្តិភាព សណ្តាប់ធ្នាប់ជូនដល់ប្រជាជន និងប្រទេសជាតិ។

សម្ដេចតេជោ ហ៊ុន សែន មានប្រសាសន៍ថា សុខសន្ដិភាព គឺជាបុព្វលក្ខខណ្ឌមិនអាចកាត់ថ្លៃបានក្នុងការអភិវឌ្ឍប្រទេសជាតិ និងធ្វើឱ្យប្រសើរឡើងជីវភាពប្រជាជនប្រចាំថ្ងៃ។

សម្តេចតេជោ ហ៊ុន សែន បញ្ជាក់ថា គុណបំណាច់យ៉ាងធំធេងរបស់កងយោធពលខេមរភូមិន្ទ មិនអាចបំភ្លេចចោលបានទេ ចំពោះលះបង់ និងពលីកម្មគ្រប់បែបយ៉ាងសម្រាប់បូរណភាពទឹកដីកម្ពុជា។

សម្ដេចតេជោ ហ៊ុន សែន មានប្រសាសន៍ថា កងពលតូចលេខ៧០ មិនត្រឹមតែជាផ្នែកមួយក្នុងកការថែរក្សាសុខសន្ដិភាពសម្រាប់កម្ពុជាប៉ុណ្ណោះទេ ប៉ុន្ដែបានក្លាយទៅជាកម្លាំងដ៏រឹងមាំកក្នុងការជួយររក្សាសន្តិភាពតាមការស្នើរបស់អង្គការសហប្រជាជាតិនៅបណ្ដាប្រទេសមួយចំនួនទៀតនៅលើពិភពលោកផងដែរ។

សម្តេចតេជោ ហ៊ុន សែន បានកោតសរសើចំពោះការសម្រេចបានយ៉ាងត្រចះត្រចង់នៃព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះនាពេលកន្លងមកថ្មីៗនេះជូនដល់បងប្អូនជនរួមជាតិគ្រប់ៗគ្នា ខណៈព្រឹត្តិការណ៍ដ៏អស្ចារ្យ និងជាប្រវត្តិសាស្រ្តនេះ បានចូលរួមចំណែកយ៉ាងធំធេងពីគ្រប់ភាគីទាំងអស់ ជាពិសេស គឺកងទ័ពតែម្តង។

សម្ដេចតេជោ ហ៊ុន សែន ថ្លែងថា រាជរដ្ឋាភិបាលនៅតែប្រកាន់ជំហរបន្តគាំទ្រឥតងាករេ ចំពោះការបន្តពង្រឹង និងពង្រីក ទំនាក់ទំនងនានាក្នុងការពង្រឹងសមត្ថភាពវិស័យកងទ័ពកម្ពុជា ដើម្បីជាខឿនការពារជាតិ។