ភ្នំពេញ៖ កិច្ចព្រមព្រៀងពាណិជ្ជកម្មសេវាកម្មអាស៊ាន ដែលជាកិច្ចព្រមព្រៀងពាណិជ្ជកម្មមួយ សម្រាប់អនុវត្តចំណោមប្រទេសជាសមាជិកអាស៊ានទាំងអស់ នឹងជួយកម្ពុជាឲ្យបានតភ្ជាប់ នូវការធ្វើពាណិជ្ជកម្ម កាន់តែទូលំទូលាយបន្ថែមទៀតទៅក្នុងតំបន់ ។

បន្ទាប់ពីកិច្ចប្រជុំគណៈកម្មាធិការអចិន្រ្តៃយ៍ព្រឹទ្ធសភា ដើម្បីពិនិត្យ និងពិភាក្សាលើរបៀបវារៈចំនួន៣ ក្រោមអធិបតីភាពសម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៅថ្ងៃទី១២ ខែមិថុនា ឆ្នាំ២០២៣ ឯកឧត្តម ម៉ម ប៊ុននាង អ្នកពាក្យព្រឹទ្ធសភា មានប្រសាសន៍ថា កិច្ចព្រមព្រៀងនេះ មានគោលបំណងសំខាន់ៗ ជាច្រើន ក្នុងនោះនឹងជួយពង្រឹងការតភ្ជាប់សេដ្ឋកិច្ច និងផ្ដល់ កាលានុវត្តភាពកាន់តែប្រសើរឡើង ​សម្រាប់ការអភិវឌ្ឍសេដ្ឋកិច្ច នៅក្នុងសហគមន៍​សេដ្ឋកិច្ចអាស៊ាន ។

ឯកឧត្តមបន្តថា នឹងជួយបង្កើនការធ្វើពាណិជ្ជកម្ម និងការវិនិយោគលើវិស័យពាណិជ្ជកម្ម សេវាកម្ម ដោយបង្កើតទីផ្សារ និងសេដ្ឋកិច្ចកាន់តែទូលំទូលាយ ហើយកាត់បន្ថយការរឹតត្បិត ចំពោះ​ពាណិជ្ជកម្ម​សេវាកម្ម និងបង្កើតបរិយាកាសពាណិជ្ជកម្ម ​ដែលអាចព្យាករណ៍បាន ។

ឯកឧត្តម អ្នកនាំពាក្យ បានបន្ថែមថា កិច្ចព្រមព្រៀងនេះ នឹងពង្រឹងទំនាក់ទំនងសេដ្ឋកិច្ចរវាងប្រទេស​ជាសមាជិកទាំងអស់​ តាមរយៈការលើកកម្ពស់ និងការសម្រួលដល់ការប្រើប្រាស់​នូវកាលានុវត្តភាព​កាន់តែប្រសើរ ការលើកកម្ពស់កិច្ចសហប្រតិបត្តិការក្នុងផ្នែកនិយ័តកម្ម ការបង្កើតកិច្ច​សហប្រតិបត្តិការ ក្នុងវិស័យអភិវឌ្ឍន៍ធនធានមនុស្ស និងការបង្កើនការចូលរួម​របស់សហគ្រាសធុនមីក្រូ តូច និងមធ្យម ក្នុងសកម្មភាពពាណិជ្ជកម្មសេវាកម្ម ហើយនឹងជួយកាត់​បន្ថយគម្លាត នៃការអភិឌ្ឍរវាងប្រទេសជាសមាជិក ដើម្បីសម្រេចបាននូវសមភាព តុល្យភាព និងនិរន្តរភាព នៃការអភិវឌ្ឍសង្គម ។

ឯកឧត្តម ម៉ម ប៊ុននាង បានបញ្ជាក់ថា នៅថ្ងៃទី១៣ ខែមិថុនា ឆ្នាំ២០២៣ ព្រឹទ្ធសភាជាតិ នឹង​បើកសម័យ​ប្រជុំលើកទី១០ នៃព្រឹទ្ធសភានីតិកាលទី៤​ ដើម្បីពិនិត្យ ហើយឱ្យយោបល់​លើសេចក្តីព្រាងច្បាប់ស្តីពី ការអនុម័តយល់ព្រម លើកិច្ចព្រមព្រៀងពាណិជ្ជកម្ម​សេវាកម្ម​អាស៊ាននេះ និងសេចក្តីព្រាងក្រមបរិស្ថាន និងធនធានធម្មជាតិ ៕ អត្ថបទ បាន សុខរិទ្ធិ