ភ្នំពេញ ដោយមានការអនុញ្ញាតដ៏ខ្ពង់ខ្ពស់របស់ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល​លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការប្រចាំការក្រសួងសុខាភិបាល បានអញ្ជើញជា​អធិបតី​ក្នុង​ពិធីប្រគល់-ទទួល ឧបករណ៍វេជ្ជសាស្ត្រអុកស៊ីសែន អំណោយរបស់យូនីសេហ្វ ជូនក្រសួងសុខាភិបាល​នៃ​​ព្រះរាជាណាចក្រកម្ពុជា រួមជាមួយលោក វីល ផាកស៍ ប្រធានយូនីសេហ្វប្រចាំនៅកម្ពុជា, នាព្រឹកថ្ងៃទី១២ ខែមិថុនា ឆ្នាំ២០២៣ ។

​ក្នុងនាមក្រសួងសុខាភិបាល លោកជំទាវរដ្ឋលេខាធិការប្រចាំការ បានថ្លែងអំណរគុណដល់យូនីសេហ្វ ដែលបាន​សហការ​គាំទ្រក្រសួងសុខាភិបាល នៃព្រះរាជាណាចក្រកម្ពុជា ចាប់តាំងពីឆ្នាំ១៩៥២ និងបានត្រឡប់មកកម្ពុជា​វិញមុនអង្គការនានា ចាប់តាំងពីក្រោយថ្ងៃ០៧ ខែមករា ឆ្នាំ១៩៧៩មក។ យូនីសេហ្វ បានដើរតួនាទីពិសេស​លេចធ្លោក្នុងប្រព័ន្ធលើកកម្ពស់សុខភាព និងសុខុមាលភាពកុមារនៅកម្ពុជា តាមរយៈគម្រោងកម្មវិធីជាច្រើនរួមមាន៖ សុខភាពមាតា និងទារក ការចាក់ថ្នាំបង្ការ អាហារូបត្ថម្ភ អនាម័យ (WASH) ការការពារកុមារ រួមបញ្ចូលទាំង​ការបណ្តុះបណ្តាលបុគ្គលិកសុខាភិបាលដើម្បីកំណត់ និងឆ្លើយតបចំពោះករណី នៃការរំលោភបំពានលើកុមារ និងគាំទ្រដល់ការបង្កើតគោលនយោបាយ និងប្រព័ន្ធការពារកុមារ។ ក្នុងការឆ្លើយតបទៅ នឹងការរាតត្បាត នៃជំងឺកូវីដ-១៩ និងធានានូវភាពបន្តនៃសេវាសុខភាពសំខាន់ៗសម្រាប់កុមារ និងស្ត្រី ជាពិសេសក្នុងអំឡុង នៃការរាត្បាត​ដោយជំងឺកូវីដ-១៩ យូនីសេហ្វ បានផ្តល់ការគាំទ្រផ្នែកបច្ចេកទេសសម្រាប់ការ​អភិវឌ្ឍផែនការ​ដាក់ពង្រាយ និងចាក់វ៉ាក់សាំងជាតិ (NDVP) ក៏ដូចជាគោលការណ៍ណែនាំប្រតិបត្តិការ និងពិធីសារជំនួយ និង​ការផ្គត់ផ្គង់សម្រាប់លទ្ធកម្មវ៉ាក់សាំង COVID-19 កែលម្អខ្សែ សង្វាក់ត្រជាក់ និងការគ្រប់គ្រង ការឆ្លង ការការពារ និងការគ្រប់គ្រងករណី យូនីសេហ្វ បានធ្វើការជិតស្និទ្ធ​ជាមួយ​ក្រសួងសុខាភិបាល ដើម្បីធានាការបន្តសេវា​ចាក់​ថ្នាំ​បង្ការជាប្រចាំក្នុងអំឡុងពេលជំងឺរាតត្បាត និងបានផ្តល់ជំនួយបច្ចេកទេស និងការផ្គត់ផ្គង់សម្រាប់យុទ្ធនា​ការចាក់​ថ្នាំបង្ការ និងការធ្វើឱ្យប្រសើរឡើងនូវឧបករណ៍ខ្សែសង្វាក់ត្រជាក់ និងការដឹកជញ្ជូនវ៉ាក់សាំង។ ភាពជាដៃគូរបស់យូនីសេហ្វ កាន់តែលេចធ្លោចាប់តាំងពីការផ្ទុះឡើង នៃជំងឺកូវីដ-១៩ ឆ្នាំ២០២០ មក ដោយ​យូនីសេហ្វ បានគាំទ្រក្រសួង ក្នុងកិច្ចខិតខំប្រឹងប្រែងក្នុងការចាក់វ៉ាក់សាំង និងឆ្លើយតបទៅនឹងជំងឺរាតត្បាត។ យូនីសេហ្វ បាននឹងកំពុងជួយដល់ក្រសួងសុខាភិបាល ក្នុងទម្រង់ជាជំនួយបច្ចេកទេស និងការផ្គត់ផ្គង់ ដើម្បីឆ្លើយ​តបទៅនឹងជំងឺកូវីដ-១៩ ជាមួយនឹងទឹកប្រាក់ជាង ៤៤លានដុល្លារអាមេរិក ក្នុងការផ្គត់ផ្គង់​ពាក់ព័ន្ធ​ជំងឺកូវីដ-១៩ រួមទាំងឧបករណ៍ខ្សែសង្វាក់ព្យាបាល និងជំងឺផ្តាសាយ វ៉ាក់សាំង និងថ្នាំព្យាបាល COVID-19 តាមរយៈភាពជា​ដៃគូរួមគ្នាពីដៃគូនានា និងអ្នកផ្តល់ជំនួយដូចជា រដ្ឋាភិបាលនៃប្រទេសជប៉ុន អូស្ត្រាលី អង់គ្លេស អាមេរិច និង​សាធារណរដ្ឋឆែកជាដើម។

លោកជំទាវវេជ្ជបណ្ឌិត យក់ សម្បតិ្ត រដ្ឋលេខាធិការប្រចាំការ បានគូសបញ្ជាក់ថា គម្រោងសហប្រតិបត្តិការទាំងនេះ ពិតជាបានរួមចំណែកពង្រឹងប្រព័ន្ធថែទាំសុខភាព ការបណ្តុះបណ្តាលធនធានមនុស្ស ជាពិសេសអំណោយ​ឧបករណ៍​វេជ្ជសាស្ត្រ អុកស៊ីសែន របស់យូនីសេហ្វ នាពេលនេះបានចូលរួមក្នុងការធ្វើទំនើបកម្មសម្ភារបរិក្ខារវេជ្ជសាស្រ្ត និងប្រព័ន្ធតាមដានជំងឺជាដើមសំដៅកាត់បន្ថយអត្រាមរណៈមាតា ទារក និងកុមារ ស្របតាមផែនការយុទ្ធសាស្ត្រ​សុខាភិបាល និងរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល ដើម្បីឈានទៅ​សម្រេច​បាននូវការគ្របដណ្តប់សុខភាពជាសកល​ និងគោលដៅអភិវឌ្ឍប្រកបដោយ​ចេរភាព ស្របតាមការចង្អុលបង្ហាញ និងដឹកនាំដ៏ត្រឹមត្រូវ និងប៉ិនប្រសបប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

លោក វីល ផាកស៍ ប្រធានយូនីសេហ្វប្រចាំនៅកម្ពុជា បានលើកឡើងថា យូនីសេហ្វនឹងខិតខំស្វែង​រកគម្រោង​កម្មវិធីសម្រាប់កិច្ចសហប្រតិបត្តិការក្នុងវិស័យសុខាភិបាលបន្ថែមទៀតនៅក្នុង​ព្រះរាជាណាចក្រកម្ពុជា៕

 អត្ថបទ៖ រដ្ឋា