មនុស្សរាប់ពាន់នាក់ដែលរស់នៅក្បែរតំបន់ភ្នំភ្លើងហ្វីលីពីន បានជ្រកកោននៅក្នុងមជ្ឈមណ្ឌលជម្លៀសខ្លួន ខណៈដែលក្រុមមន្ត្រីបានព្រមានកាលពីថ្ងៃអាទិត្យ (១១ មិថុនា) អំពីហានិភ័យសុខភាពដែលបណ្ដាលពីផ្សែងផេះ និងឧស្ម័នពុលដែលព្រួសចេញពីរណ្ដៅភ្នំភ្លើងដែលកំពុងផ្ទុះ។

ក្រុមអ្នកស្រាវជ្រាវផ្នែករញ្ជួយដីបាននិយាយថា ពួកគេបានកត់ត្រាការរញ្ជួយដីដែលបណ្ដាលពីបន្ទុះភ្នំភ្លើងយ៉ាងហោចណាស់មួយករណីក្នុងរយៈពេល ២៤ ម៉ោងកន្លងមក ហើយផ្ទាំងថ្មដ៏ក្តៅក្រហមច្រាលបានធ្លាក់ចុះពីភ្នំ Mayon ក្នុងតំបន់ Albay ភាគកណ្តាល។

ការិយាល័យការពារជនស៊ីវិលហ្វីលីពីនបាននិយាយថា មនុស្សជាង ១២.៨០០ នាក់ត្រូវបានបញ្ចូនទៅកាន់មជ្ឈមណ្ឌលជម្លៀសខ្លួនដែលភាគច្រើនមកពីភូមិកសិកម្មរស់នៅក្បែរនោះ ឬនៅតាមជើងភ្នំភ្លើង។

ភ្នំ Mayon ដែលមានចម្ងាយប្រហែល ៣៣០ គីឡូម៉ែត្រភាគអាគ្នេយ៍នៃរដ្ឋធានីម៉ានីល ត្រូវបានចាត់ទុកថាជាភ្នំភ្លើងសកម្មបំផុតមួយក្នុងចំណោមភ្នំភ្លើងសកម្មចំនួន ២៤ របស់ប្រទេសហ្វីលីពីន។

ប្រព័ន្ធប្រកាសព្រមានគ្រាអាសន្នប្រាំដំណាក់កាលសម្រាប់ភ្នំភ្លើង ត្រូវបានប្រកាសឡើងពីដំណាក់កាលទី២ ទៅដំណាក់កាលទី៣ កាលពីថ្ងៃព្រហស្បតិ៍ ដោយក្រុមអាជ្ញាធរបានព្រមានអំពីជំងឺផ្លូវដង្ហើមដែលអាចកើតមានពីការស្រូបចូលផ្សែងពីបន្ទុះភ្នំភ្លើងនេះ៕