ទីក្រុង Siliguri ភាគខាងកើតរបស់ប្រទេសឥណ្ឌាដាក់លក់ផ្លែស្វាយ 'មីយ៉ាហ្សាគី' (Miyazaki) ជាផ្លែស្វាយថ្លៃបំផុតលើពិភពលោកដាំដុះនៅក្នុងប្រទេសជប៉ុន ត្រូវបានដាក់តាំងបង្ហាញ និងលក់ក្នុងតម្លៃជាង ១.២០០ ដុល្លារក្នុងមួយគីឡូក្រាមក្នុងពិធីបុណ្យផ្លែស្វាយ Geetanjali លើកទី ៧ កាលពីថ្ងៃសុក្រ (៩ មិថុនា)។

ផ្លែស្វាយ 'មីយ៉ាហ្សាគី' ដែលត្រូវបានគេដាក់ឈ្មោះតាមទីក្រុងរបស់ជប៉ុន ជាទីដើមកំណើតរបស់ផ្លែស្វាយនោះ មានតម្លៃខ្ពស់ដោយសារតែវាមានរសជាតិសម្បូរបែប សាច់ហ្មត់មានជាតិទឹកដោះគោ និងមានរសជាតិផ្អែម។

ផ្លែស្វាយជប៉ុនប្រភេទនេះ បច្ចុប្បន្នត្រូវបានគេដាំនៅភូមិ Labhpur ស្រុក Birbhum ភាគខាងកើតប្រទេសឥណ្ឌា ដោយប្រើវិធីបន្សាំ។

ពិធីបុណ្យផ្លែស្វាយនេះក៏បានដាក់តាំងបង្ហាញនូវប្រភេទផ្លែឈើរដូវក្តៅផ្សេងៗទៀតផងដែរ ខណៈអ្នកទស្សនាបានប្រមូលផ្តុំគ្នាពាសពេញតូបលក់ និងបាននាំគ្នាភ្លក់ផ្លែស្វាយនេះ។

ទីផ្សារផ្លែស្វាយរបស់ប្រទេសឥណ្ឌា ផ្គត់ផ្គង់ជាអាហារ និងភេសជ្ជៈដ៏ធំបំផុតរបស់ពិភពលោក រួមមានក្រុមហ៊ុន PepsiCo, ក្រុមហ៊ុន Coca Cola និងក្រុមហ៊ុន Unilever៕