អាមេរិក ៖ គុណភាពខ្យល់មិនល្អបានកើតមាននៅតំបន់ភាគឦសាននៃសហរដ្ឋអាមេរិកជាថ្មីម្ដងទៀត កាលពីថ្ងៃអាទិត្យ បើទោះបីជាគ្មានទីកន្លែងណាមួយ ដែលជិតមានអ័ព្ទក្រាស់ដ៏អាក្រក់ដូចដែលបានគ្របដណ្ដប់លើតំបន់នេះ ថ្មីៗនេះ រហូតដល់នាំឲ្យមានការផ្សព្វផ្សាយជាសកលក៏ដោយ ខណៈដែលផ្សែងដែលបណ្តាលមកពីខ្យល់នៃចំហេះព្រៃ នៅប្រទេសកាណាដា បានបណ្តាលឲ្យមេឃពណ៌ប្រែទៅជាពណ៌ទឹកក្រូច មានផ្សែងអ័ព្ទក្រាស់ និងកម្រិត​បង្កកង្វក់​ខ្ពស់បំផុត។

នៅព្រឹកថ្ងៃអាទិត្យ ផ្សែងបានបក់ នៅពាសពេញទីក្រុងញូវយ៉ក ដោយធ្វើឲ្យសន្ទស្សន៍គុណភាពខ្យល់ ក្នុងទីក្រុងនេះ នៅកម្រិត ១០៣ ហើយត្រូវបានចាត់ចូលថា ជា «ពពួកដែលបង្កគ្រោះថ្នាក់ដល់សុខភាព» ជាពិសេស ចំពោះអ្នកដែលមានបញ្ហាបេះដូង ឬសួត។

យោងតាមគេហទំព័រទិន្នន័យបរិស្ថាន និងសុខភាពរបស់ទីក្រុង គុណភាពខ្យល់ភាគច្រើន បាននិងកំពុងប្រសើរឡើង​ជាបន្តបន្ទាប់ គិតចាប់តាំងពីអ័ព្ទពណ៌លឿងក្រាស់ បានគ្របដណ្តប់ទីក្រុងនេះ កាលពីសប្តាហ៍មុន ដោយសារផ្សែង​ពីភ្លើង ដែលកំពុងតែបន្តឆេះព្រៃនៅប្រទេសកាណាដា និងដែលមានសញ្ញាតិចតួចពីការរលត់ឆាប់ៗ។ តែយ៉ាងណាក្ដី គេហទំព័រនោះ បាននៅឲ្យដឹងទៀតថា ពីមួយម៉ោងទៅមួយម៉ោង វានៅតែមានការប្រែប្រួលខ្លាំង ក្នុងគុណភាពខ្យល់ សូម្បីតែនៅក្នុងសង្កាត់ដែលមានខ្យល់អាកាសបរិសុទ្ធបំផុតក៏ដោយ។

យោងតាមសេចក្ដីរាយការណ៍របស់សារព័ត៌មាន Penn Live បានឲ្យដឹងថា នៅរដ្ឋ Pennsylvania នាយកដ្ឋានការពារ​បរិស្ថានរបស់រដ្ឋ បានប្រកាសកាលពីថ្ងៃអាទិត្យសកម្មភាពគុណភាពខ្យល់ និងបានចេញការជូនដំណឹង​ព្រមានពណ៌ទឹកក្រូច (គុណភាពខ្យល់មធ្យម)។ ការជូនដំណឹងនេះ បានកើតឡើងដោយសារកម្រិតអូហ្សូន​កើនឡើងនៅទូទាំង​តំបន់ចំនួនបីនៃរដ្ឋ Pennsylvania រួមមានតំបន់ Philadelphia ជ្រលងភ្នំ Lehigh និងតំបន់កណ្តាល Pennsylvania នៃទីក្រុង Cumberland, Dauphin, Lancaster, Lebanon និង York៕