រដ្ឋមន្ត្រីទីស្តីការគណៈរដ្ឋមន្ត្រីជប៉ុន លោក Matsuno Hirokazu បាននិយាយថា រដ្ឋាភិបាលជប៉ុន បានច្រានចោលការអះអាងរបស់រុស្ស៊ីអំពី​ការសម្រេចចិត្តរបស់ទី​ក្រុងតូក្យូក្នុងការផ្គត់ផ្គង់​បរិក្ខារការពារជាតិដល់ប្រទេសអ៊ុយក្រែន។

ក្រសួងការបរទេសរុស្ស៊ី បាននិយាយកាលពីថ្ងៃសុក្រថា ខ្លួនបានកោះហៅឯកអគ្គរាជទូតជប៉ុនប្រចាំទីក្រុងមូស្គូលោក Kozuki Toyohisa ដើម្បីប្រាប់លោកថា ផែនការនេះនឹងនាំ​ទៅរក​ការ​កាន់​តែរីកធំនៃសកម្មភាពអរិភាព និងការការស្លាប់និងរងរបួសកាន់តែច្រើន។

រដ្ឋាភិបាលជប៉ុន មានផែនការផ្តល់ឲ្យអ៊ុយក្រែននូវរថយន្តដឹកទំនិញ ១០០គ្រឿង និងយានយន្តផ្សេងទៀតពីកងកម្លាំងស្វ័យការពារដែនជើងគោក។ ក្រសួងការបរទេសរុស្ស៊ី ចាត់​ទុក​ជំនួយ​​ទាំង​នេះថា ជា«គ្រឿងយុទ្ធោបករណ៍»។ លោក Matsuno បានប្រាប់អ្នករាយការព័ត៌មានថា ឯកអគ្គរាជទូតជប៉ុនបានច្រានចោលការអះអាងរបស់រុស្ស៊ី។ 

លោ​ក Matsuno និយាយថាលោក Kozuki បានប្រាប់ទីក្រុងមូស្គូថា ការឈ្លានពានរបស់ខ្លួនលើអ៊ុយក្រែន បាននាំមកនូវស្ថានភាពបច្ចុប្បន្ន ហើយនោះ គឺជាការប៉ុនប៉ងបង្វែរកំហុសមក​លើទី​ក្រុងតូក្យូ ជារឿងអយុត្តិធម៌បំផុត និងពុំអាចទទួលយកបានទាល់តែសោះ។ ឯកអគ្គរាជទូតត្រូវបានរាយការណ៍ថា បាននិយាយថា ការឈ្លានពានរបស់រុស្ស៊ី គឺជាការបំពានច្បាស់​លាស់​​លើច្បាប់អន្តរជាតិ និងពុំអាចអត់ឱនឲ្យបាន ហើយលោបានជំរុញដ៏ទទូចឲ្យទីក្រុងមូស្គូដកកងទ័ពរបស់ខ្លួនចេញជាបន្ទាន់។

លោក Matsuno បានបញ្ជាក់ ប្រទេសជប៉ុន នឹងបន្តដាក់ទណ្ឌកម្មតឹងរ៉ឺងលើប្រទេសរុស្ស៊ី និងគាំទ្រដោយឥតងាករេចំពោះអ៊ុយក្រែន ដើម្បីជួយបញ្ឈប់ការវាយលុកឲ្យ​បានកាន់តែឆាប់​តាមដែល​អាចធ្វើទៅបាន។