នៅលើអាកាសយានដ្ឋានកងទ័ពអាកាសដ៏តូចមួយរបស់ប្រទេសអ៊ុយក្រែន អ្នកបើកឧទ្ធម្ភាគចក្រ លោក Denys បានប្រាប់សារព័ត៌មាន Reuters ថា ការការពារដែនអាកាសរបស់រុស្ស៊ី​កាន់​តែ​មានភាពទំនើប និងបង្ហាញឲ្យឃើញនូវការបង្កហេតុខ្លាំងជាងពីមុន។

និយា​យនៅឯទីតាំងដែលមិនត្រូវបានបញ្ចេញឲ្យដឹងនៅភាគខាងកើតអ៊ុយក្រែន អាកាសយានិកកងទ័ពអាកាសដ៏មានបទពិសោធន៍រូបនេះ បាននិយាយថា ប្រទេសអ៊ុយក្រែនកំពុងទន្ទឹងរង់​ចាំ​ទទួលគ្រាប់រ៉ុក្កែតបាញ់ពីលើអាកាសជំនាន់ថ្មីពីលោកខាងលិច ដែលលោកសង្ឃឹមថា នឹងជួយដល់អាកាសយានិក ក្នុងការប្រយុទ្ធ នាពេលខាងមុខដ៏ខ្លីនេះ។

លោ​ក Denys បាននិយាយថា៖ «យើងរង់ចាំការដឹកជញ្ជូនមកឲ្យពួកយើង។ យើងនឹងទទួលគ្រាប់រ៉ុក្កែតទាំងនេះ ប៉ុន្តែយើងនឹងត្រូវត្រួតពិនិត្យ ដើម្បីហ្វឹកហាត់ជាមួយពួកគេ និង​ប្រើប្រាស់​រ៉ុក្កែត​​ទាំងនេះ ក្នុងអំឡុងពេលហ្វឹកហាត់។ បន្ទាប់មក យើងនឹងអាចប្រើរ៉ុក្កែត ក្នុងការប្រយុទ្ធ ខ្ញុំសង្ឃឹមបែបនេះ»។

លោក​ Denys បានបន្ថែម​ថា ការការពារដែនអាកាសរបស់រុស្ស៊ីដែលកាន់តែប្រសើរឡើង នៅភាគខាងកើត បានធ្វើឲ្យពិបាក ក្នុងការហោះហើរឧទ្ធម្ភាគចក្រវាយ​ប្រហារ​ដែល​ផលិត​ដោយ​សូវៀត នៅជិតសមរភូមិ៕