ភ្នំពេញ៖ ប្រជាពលរដ្ឋនៅសង្កាត់បឹងធំ ក្នុងខណ្ឌកំបូល ប្តេជ្ញាចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ គ្រប់ៗគ្នា និងបោះជូនឆ្នោតជូនគណបក្សប្រជាជនកម្ពុជា ព្រោះមានតែគណបក្សប្រជាជនកម្ពុជាមួយគត់ បាននាំមកនូវសន្តិភាព និងការអភិវឌ្ឍន៍។
ប្រជាពលរដ្ឋរស់នៅក្នុងសង្កាត់បឹងធំ ក្នុងខណ្ឌកំបូល រាជធានីភ្នំពេញ បានថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នក យកព័ត៌មាន BTV នៅក្នុងពិធីសំណេះសំណាលជាមួយមេគ្រួសារបក្ស នៃគណបក្សប្រជាជនកម្ពុជានៅសង្កាត់បឹងធំ ខណ្ឌកំបូល រាជធានីភ្នំពេញ ជាង ២ពាន់គ្រួសារ នៅថ្ងៃទី ១១ ខែ មិថុនា ឆ្នាំ ២០២៣ នេះថា រាជរដ្ឋាភិបាលដែលកើតចេញពីគណបក្សប្រជាជនកម្ពុជា បានខិតខំប្រឹងប្រែងអភិវឌ្ឍន៍ប្រទេសជាតិពីបាទដៃទទេរ រហូតមកដល់បច្ចុប្បន្ន ដូចយើងបានឃើញស្រាប់ហើយ គឺមានការអភិវឌ្ឍន៍រីកចម្រើនយ៉ាងខ្លាំងរួមមាន សាលារៀន ផ្លូវថ្នល់ ទឹក ភ្លើង ការអភិវឌ្ឍន៍មណ្ឌលផ្សេងៗសម្រាប់ជួយដល់មូលដ្ឋាន។ ចំណែកការអភិវឌ្ឍន៍ផ្នែកចំណេះដឹង បានធ្វើឲ្យយុវជនកម្ពុជា ជាយុវជនពោពេញទៅដោយសក្តានុពល ក្នុងការចូលរួមជាមួយសង្គម និងការបញ្ចេញមតិយោបល់ផ្សេងៗជាដើម។
ប្រជាពលរដ្ឋទាំងនេះ បានលើកឡើងស្រដៀងគ្នាទៀតថា ចំពោះសមិទ្ធផលដែលបានកើតឡើងទាំងអស់ ធ្វើឲ្យប្រជាពលរដ្ឋ មិនអាចកាត់ថ្លៃបានឡើយ ជាពិសេសការជ្រកនូវក្រោមម្លប់នៃសន្តិភាពដ៏ត្រជាក់ត្រជុំ ក្រោមការដឹកនាំរបស់រដ្ឋាភិបាល ដែលបានកើតចេញពីគណបក្សប្រជាជនកម្ពុជាពិតៗ ។ តាមរយៈនេះ មិនអាចធ្វើឲ្យប្រជាជនបំភ្លេចបានឡើយ ហើយនៅក្នុងឱកាសបោះឆ្នោតជ្រើសរើសតំណាងរាស្ត្រ នីតិកាលទី ៧ នាពេលខាងមុខនេះ ពួកគាត់ប្តេជ្ញាចិត្តនឹងចូលរួម គៀងគរបងប្អូន កូនក្មួយ ទៅបោះឆ្នោតទាំងអស់គ្នា និងបោះឆ្នោតជូនគណបក្សប្រជាជនកម្ពុជា ដើម្បីទទួលបាននូវការអភិវឌ្ឍន៍ប្រទេសជាតិឲ្យកាន់តែសំបូររុងរឿង។
ឯកឧត្តម ប៊ុន សំបូរ អនុប្រធានក្រុមការងារថ្នាក់ជាតិចុះជួយសង្កាត់បឹងធំ បានថ្លែងថា ដូចបងប្អូនជ្រាបស្រាប់ហើយ គណបក្សប្រជាជនកម្ពុជា ក្នុងនាមជាគណបក្សកាន់អំណាចដោយស្របច្បាប់ តាមលទ្ធិប្រជាធិបតេយ្យ សេរី ពហុបក្ស បានគោរពយ៉ាងម៉ឺងម៉ាត់នូវរដ្ឋធម្មនុញ្ញនៃព្រះរាជាណាចក្រកម្ពុជា គោលការណ៍លទ្ធិប្រជាធិបតេយ្យ និងច្បាប់ជាធរមាន ដើម្បីគ្រប់គ្រង ដឹកនាំប្រទេស ដែលធ្វើឲ្យប្រជាជនទូទៅ មានសិទ្ធិសេរីភាពគ្រប់បែបយ៉ាង មានសុខសន្តិភាព សុវត្ថិភាព និងទទួលបានមនុញ្ញផលគ្រប់គ្នា ពីការរីចម្រើនរបស់ប្រទេសជាតិ, ក្នុងនោះកាលពីថ្ងៃទី ២៨ មករា ២០២៣ គណបក្សប្រជាជនកម្ពុជា បានធ្វើមហាសន្និបាតវិសាមញ្ញតំណាងទូទាំងប្រទេស នៅវិមាន៧មករា ទីស្នាក់ការកណ្តាលគណបក្ស ដើម្បីពិនិត្យ វាយតម្លៃលើការងារសំខាន់ៗ និងកំណត់ដាក់ចេញនូវទិសដៅការងារសម្រាប់អនុវត្តន៍ជាបន្តទៀតជាច្រើន។
ឯកឧត្តម បន្តថា ឆ្នាំ២០២៣ នេះ គឺជាឆ្នាំដែលត្រូវបញ្ចប់អាណត្តិរដ្ឋសភា និងរដ្ឋាភិបាលឆ្នាំ ២០១៨-២០២៣ និងក៏ជាឆ្នាំដែលត្រូវចាប់ផ្តើមនីតិកាលថ្មី រយៈពេល៥ឆ្នាំបន្តទៀត។ ប្រការនេះបញ្ជាក់ថា យើងពិតជាមានកិច្ចការជាច្រើន ដែលត្រូវធ្វើនាពេលខាងមុខនេះ ជាពិសេសយើងត្រូវរួមគ្នាធ្វើរាល់កិច្ចការ ឲ្យបានល្អបំផុត ដើម្បីឈានទៅដណ្តើមជ័យជម្នះក្នុងការបោះឆ្នោតជ្រើសរើសតំណាងរាស្ត្រ នីតិកាលលើកទី៧ នាថ្ងៃអាទិត្យ ទី២៣ ខែកក្កដា ឆ្នាំ២០២៣ នាពេលខាងមុខនេះ ដូច្នេះសូមប្រជាពលរដ្ឋ ជាពិសេសយុវជនទាំងអស់ត្រូវរៀបចំខ្លួន និងត្រៀមលក្ខណៈសម្បត្តិឲ្យគ្រប់គ្រាន់ ក្នុងការចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ និងបោះឆ្នោតជូនគណបក្សប្រជាជនកម្ពុជា ឈរលេខរៀងទី១៨ ដើម្បីដណ្តើមយកជ័យជម្នះ ដែលជាគោលដៅដ៏សំខាន់ ក្នុងការបន្តដឹកនាំប្រទេសជាតិ ដើម្បីប្រជាជនទាំងមូល និងដើម្បីប្រទេសជាតិទាំងមូល។
សូមបញ្ជាក់ថា នៅក្នុងកម្មវិធីនេះដែរ គ្រួសារបក្សទាំងអស់ ក្នុងគ្រួសារនីមួយៗទទួលបានថវិកា ១ម៉ឺនរៀល និងសារ៉ុងមួយ ជាពិសេសក្នុងពិធីនេះដែរក៏មានបង្កើតកម្មវិធីចាប់រង្វាន់ មានចំនួនប្រមាណជាង ២៧០ រង្វាន់ សម្រាប់លើកទឹកចិត្តដល់មេគ្រួសារបក្សដែលបានចូលរួមក្នុងពិធីសំណេះសំណាល នេះ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
