លោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម នៃក្រសួងវប្បធម៌ និង​វិចិត្រ​សិល្បៈ តាមរយៈBTV ព័ត៌មាន នាព្រឹកនេះថា ឆ្នាំ២០២៣នេះ នាយកដ្ឋាន នឹង​បើក​វគ្គ​បណ្តុះ​បណ្តាល ផ្តោតលើជំនាញវិជ្ជាសិល្បៈខ្មុក និងបើកមហោស្រពសិល្បៈចម្លាក់ស្មិត ក្រោម​ប្រធាន​បទ​ «ក្បាច់គុនបុរាណខ្មែរល្បុក្កតោ»។

លោក ឈឹម សុធី បានបន្តថា នៅក្នុងឆ្នាំ២០២៣នេះ នាយកដ្ឋាន មានកម្មវិធីធំៗចំនួន ០២ គឺ​ទី១​៖ មន្រី្តជំនាញរបស់យើង គ្រោងនឹងចុះទៅបណ្តុះបណ្តាលវិជ្ជាសិល្បៈខ្មុក និងគំនូ ជូន​ដល់​សិស្សានុសិស្ស​នៅ​វត្តស្វាយអណ្តែត និងតាមសហគមន៍ ក្នុងស្រុកល្វាឯម ខេត្តកណ្តាល ដោយ​ឲ្យ​មិន​ប៉ះ​ពាល់ដល់ម៉ោងសិក្សារបស់សិស្សានុសិស្សក្នុងអំឡុងពេល កំពុងសិក្សា​នៅ​តាម​អនុវិទ្យាល័យ និងវិទ្យាល័យនោះទេ។ ទី២៖សិល្បៈចម្លាក់ស្មិត ឆ្នាំ២០២៣ ប្រារ​ព្ធ​ឡើង​ ដើម្បី​ជំរុញ និងលើកទឹកចិត្តដល់សិល្បករ សិប្បករ ក្នុងការអភិវឌ្ឍន៍សមត្ថភាព និងការ​បង្កើត​គំនិត​ច្នៃ​ប្រឌិត ដើម្បីរួមចំណែកអភិរក្ស និងអភិវឌ្ឍន៍វិស័យសិល្បៈសូនរូប និងសិល្បៈ​សិប្បកម្ម​ឲ្យ​បាន​គង់​វង្ស​។ លោក ឈឹម សុធី បញ្ជាក់ថា មហោស្រពសិល្បៈចម្លាក់ស្មិត ក្រោមប្រធានបទ «ក្បាច់​គុន​បុរាណ​ខ្មែរ​ល្បុក្កតោ» ត្រៀមរៀបចំនៅខែវិច្ឆិកា ឆ្នាំ២០២៣។ ហើយ​ឥលូវ​នេះយើង​កំពុង​ស្វែង​រក​សិល្បករ ដែលមានជំនាញស្មិត ដើម្បីចុះជួបពួកគាត់ និងផ្សព្វផ្សាយ​អំពី​គោល​បំណង​របស់​មហោ​ស្រព​សិល្បៈ​ចម្លាក់សិ្មត ហើយការរៀចំព្រឹតិ្តការណ៍ខាងលើនេះ ដោយសារទី១៖ ចម្លាក់ស្មិតនេះ នៅ​សល់​អ្នកធ្វើ មានចំនួនតិចតួច។ ដូច្នេះមន្រី្តរបស់យើង ចូលរួមលើកកម្ពស់ ផ្សព្វផ្សាយ និងរៀប​ចំ​ការតាំងពិព័រណ៌ ដើម្បីឲ្យពួកគាត់បានចូលរួមក្នុងការងារមហោស្រព ឲ្យ​មាន​ជា​ការ​ប្រឡង​ស្នាដៃ ចម្លាក់ស្មិត ខាងណាមានទឹកដៃល្អជាងគេ។ ចំណែកចំណងជើង ជ្រើស​រើស​យក​ប្រធាន​បទ«ក្បាច់​គុន​បុរាណ​ខ្មែរល្បុក្ក​តោខ្មែរ​»​ ដែល​បាន​ចាត់​ចូល​ក្នុង​បញ្ជី​បេតិកភណ្ឌពិភពលោកនៃមនុស្សជាតិ ដែលមក​ទល់​នឹ​ងប​ច្ចុប្បន្ន​មាន​ការ​រីក​ចម្រើន​លើ​វិស័យ​ក្បាច់​គុន​បុរាណខ្មែរ។

សូមរម្លឹកផងដែរថា ក្បាច់បុរាណខ្មែរល្បុក្កតោខ្មែរ ត្រូវបានចុះ​បញ្ជី​ជា​សម្បត្តិ​បេតិកភណ្ឌ​វប្បធម៌​អរូបី នៃមនុស្ស ជាតិ របស់អង្គការ យូណេស្កូ នៅថ្ងៃទី២៩ ខែវិច្ឆិកា ឆ្នាំ២០២២។ ការ​សម្រេច​នេះ​ធ្វើ​នៅ​ក្នុង​កិច្ចប្រជុំលើកទី១៧ នៃកិច្ច ប្រជុំគណៈកម្មាធិការអន្តររដ្ឋាភិបាល ដើម្បីការពារ​បេតិកភណ្ឌ​វប្បធម៌ របស់អង្គការ យូណេស្កូ ដែលប្រារព្ធឡើងនៅទីក្រុងរ៉ាបាត នៃប្រទេសម៉ារុក៕ អត្ថបទ៖ រដ្ឋា