កំពង់ឆ្នាំង៖ ក្រោយពីមានហេតុការណ៍គ្រោះថ្នាក់ចរាចរណ៍កើតឡើងច្រើន នៅលើផ្លូវជាតិលេខ៥ ត្រង់​ចំនុច​ផ្លូវ​វាងក្រុងកំពង់ឆ្នាំង នាព្រឹកថ្ងៃទី១៣ ខែមិថុនា ឆ្នាំ២០២៣នេះ នាយកដ្ឋាន​នគរបាល​ចរាចរណ៍​ផ្លូវ​គោក និងសណ្តាប់ធ្នាប់សាធារណៈនៃអគ្គស្នងការនគរបាលជាតិ មន្ទីរសាធារណការ និង​ដឹកជញ្ជូនខេត្តកំពង់ឆ្នាំង រួមនឹងក្រុម​ជំនាញ​ការ​ជប៉ុន​(ចៃកា) បាន​ចុះ​ផ្សព្វ​ផ្សាយ​ច្បាប់​ចរាចរ​ដល់​អ្នក​ប្រើ​ប្រាស់ផ្លូវទាំងអស់ អោយយល់ពីច្បាប់ និងស្លាកបញ្ជាចរាចរណ៍ ដើម្បីបញ្ជៀស​រាល់​គ្រោះថ្នាក់​ចរាចរណ៍ទាំងឡាយដែលអាចកើតឡើងជាយថាហេតុ។

លោកឧត្តមសេនីយ៍ទោ ឡៃ ហួត អនុប្រធាននាយកដ្ឋាននគរបាលចរាចរណ៍ផ្លូវគោក និង​សណ្តាប់​ធ្នាប់​សាធារណៈ នៃអគ្គស្នងការនគរបាលជាតិបានថ្លែងថា កន្លងមក នៅចំណុច​ផ្លូវ​បែក​ជា​៤​លើ​កំណាត់ផ្លូវជាតិលេខ៥នេះ បានបង្កគ្រោះថ្នាក់ច្រើនដល់អ្នកប្រើប្រាស់ផ្លូវ ធ្វើអោយមា​ន​ស្លាប់ និងរបួសជាច្រើននាក់ ។ កត្តាគ្រោះថ្នាក់ចរាចរណ៍ទាំងនេះ បណ្តាលមកពីអ្នកប្រើប្រាស់ផ្លូវ មិន​មានការប្រុងប្រយ័ត្នក្នុងពេលបើកបរ ប្រើប្រាស់ល្បឿនលឿនហួសកំណត់ ការឆ្លង​កាត់​មិន​ប្រុង​ប្រយ័ត្ន មិនគោរពច្បាប់ចរាចរណ៍ និងស្លាកបញ្ជាទិសចរាចរណ៍ជាដើម។ ក្រោយ​ពី​មាន​គ្រោះ​ថ្នាក់​ចរាចរ​ណ៍​កើតឡើងច្រើនបែបនេះ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ក្រុម​ជំនាញការជប៉ុន(ចៃកា) រួមនិងមន្ទីរសាធារណៈការ និងដឹកជញ្ជូនខេត្ត បានចុះ​បញ្ជៀប​ច្បាប់​ចរាចរណ៍ ពន្យល់ណែនាំអ្នកប្រើប្រាស់ផ្លូវអោយស្គាល់ពីស្លាកបញ្ជាទិសចរាចរណ៍ និងស្តាប់​នូវ​សំណូមពររបស់អ្នកប្រើប្រាស់ផ្លូវទាំងអស់ផងដែរ។

លោក មាស ឈុនលី ប្រធានការិយាល័យសុវត្ថិភាពចរាចរណ៍ផ្លូវគោកនៃមន្ទីរសាធារណៈការ និង​ដឹក​ជញ្ជូន​ខេត្តបានអោយដឹងថា ក្រោយពីបានបញ្ជៀបច្បាប់ចរាចរណ៍ និងពន្យល់​អោយ​ពួក​គាត់​បាន​ស្គាល់​ពីស្លាកបញ្ជាចរាចរណ៍មក ប្រជាពលរដ្ឋ​ដែល​ជា​អ្នក​ប្រើ​ប្រាស់​ផ្លូវ​បាន​យល់​ដឹង​ពី​ស្លាក​បញ្ជា​ទិសចរាចរណ៍ និងច្បាប់ ហើយពួកគាត់ក៏បានសំណូមពរដល់ក្រុមការងារទាំងអស់ អោយ​ជួយ​ដាក់​ភ្លើងស្តុបនៅចំណុចផ្លូវបំបែកជា៤នោះផង ដើម្បីជួយបញ្ជៀសរាល់គ្រោះថ្នាក់ផ្សេងៗ។ ក្រុម​ការងារក៏បានប្រគល់មួកសុវត្ថិភាពជូនពួកគាត់ផងដែរ ក្រោយ​ពី​ឆ្លើយ​ត្រូវ​នឹង​សំណួរ​ពាក់ព័​ន្ធ​ចរាចរណ៍​ចំនួន៣សំណួរ៕ ហុង វាស្នា