ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានប្រកាសគាំទ្រទាំងស្រុងចំពោះការផ្តួចផ្តើមរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ក្នុងការធ្វើវិសោធនកម្មច្បាប់បោះឆ្នោត ដើម្បីកែទម្រង់ «សិទ្ធិក្នុងការឈរឈ្មោះឲ្យគេបោះឆ្នោត» ខណៈច្បាប់នេះត្រូវបានប្រទេសមួយចំនួន នៅលើសកលលោកបានអនុវត្តរួចមកហើយនោះ។

ថ្លែងប្រាប់ទូរទស្សន៍BTV ក្រោយអញ្ជើញជាអធិបតីភាពក្នុងពិធីបញ្ចុះបឋមសិលាសាងសង់​អគារសិក្សាថ្មី សម្ពោធសមិទ្ធផលនានា បើកវគ្គថ្នាក់វិក្រឹត្យការគ្រូពេទ្យមធ្យមយោធាជំនាន់ទី៦ «សមាហរណកម្ម» និងប្រគល់សញ្ញាបត្រជូននិស្សិតបញ្ចប់វគ្គសិក្សានាថ្ងៃទី១៣ ខែមិថុនា ឆ្នាំ២០២៣នេះ នៅវិទ្យាស្ថានវិទ្យាសាស្រ្តសុខាភិបាលកងយោធពលខេមរភូមិន្ទ សម្តេចពិជ័យសេនា ទៀ បាញ់ បានលើកឡើងថា ដូចអ្វីដែលសម្តេចតេជោ ហ៊ុន សែន មានប្រសាសន៍ហើយថា ការកែទម្រង់«សិទ្ធិក្នុងការឈរឈ្មោះឲ្យគេបោះឆ្នោត»នេះ វាជារឿងចាំបាច់ដើម្បីពង្រឹង និងលើក​កម្ពស់ដំណើរការប្រជាធិបតេយ្យនៅកម្ពុជា ជាពិសេសគឺដើម្បីឱ្យអនាគតអ្នកដឹកនាំទាំង​នៅថ្នាក់ជាតិ និងថ្នាក់ក្រោមជាតិ ដែលត្រូវជ្រើសរើសតាមរយៈការបោះឆ្នោត ត្រូវមានការទទួលខុសត្រូវ​ខ្ពស់ចំពោះជាតិ និងប្រជាជន ​ហើយការទទួលខុសត្រូវនេះ ត្រូវចាប់ផ្តើមពីការអនុវត្តឱ្យបាន​ខ្ជាប់ខ្ជួននូវសិទ្ធិបោះឆ្នោត ​ដែលជាករណីកិច្ចរបស់ប្រជាពលរដ្ឋគ្រប់រូបចំពោះប្រទេសជាតិ នៅក្នុងសង្គមប្រជាធិបតេយ្យជាដើមនេះ។

សូមបញ្ជាក់ថា នៅយប់ថ្ងៃទី១២ ខែមិថុនា ឆ្នាំ២០២៣នេះសម្តេចតេជោ ហ៊ុន សែន នាយករដ្ឋមន្ត្រី​នៃកម្ពុជា បានស្នើឱ្យសិក្សាធ្វើវិសោធនកម្មច្បាប់ស្តីពីការបោះឆ្នោត ដើម្បីដក​សិទ្ធិឈរឈ្មោះ​ឱ្យគេបោះឆ្នោត សម្រាប់ជនណាដែលមិនទៅបោះឆ្នោត។

សម្តេចតេជោ បានបញ្ជាក់ថា «អ្នកដែលមានបំណងចង់ឈរឈ្មោះឱ្យគេបោះឆ្នោត ត្រូវមាន​ការទទួលខុសត្រូវ ក្នុងនាមជាពលរដ្ឋល្អរបស់ជាតិ ​ក្នុងសង្គមប្រជាធិបតេយ្យ ដោយចាប់ផ្តើម​ពីការអនុវត្ត ឱ្យបាន​ខ្ជាប់ខ្ជួន​នូវ​សិទ្ធិបោះឆ្នោត ​ក្នុងន័យនេះអ្នកដែលមិនបានបោះឆ្នោត ដោយគ្មាន​មូលហេតុសមរម្យតាមផ្លូវច្បាប់ នឹងត្រូវចាត់ទុកថា បានបាត់បង់នូវលក្ខខណ្ឌក្នុងការឈរ​ឈ្មោះ​ឱ្យគេបោះឆ្នោត ប៉ុន្តែអ្នកទាំងនោះនៅតែមានសិទ្ធិទៅបោះឆ្នោតក្នុងនាមជាពលរដ្ឋដដែល ដោយមិនមានផលប៉ះពាល់អ្វីនោះឡើយ»។

នៅក្នុងកិច្ចសម្ភាសន៍ជាមួយទូរទស្សន៍BTVនេះដែរ សម្តេចពិជ័យសេនា ទៀ បាញ់ ក៏បានអំពាវនាវ​ដល់នាយទាហាន នាយទាហានរង ពលទាហានក៏ដូចជាបងប្អូនប្រជាពលរដ្ឋខ្មែរទាំងអស់ដែល​មានឈ្មោះបោះឆ្នោតសូមអញ្ជើញទៅបោះឆ្នោតឲ្យបានគ្រប់ៗនាថ្ងៃទី២៣​ ខែកក្កដា ឆ្នាំ២០២៣នេះ ខណៈព្រឹត្តិការណ៍នេះប្រាំឆ្នាំមានម្តង ​ដូច្នេះក្នុងនាមយើងប្រជាពលរដ្ឋរស់នៅក្នុងប្រទេសដែល​ប្រកាន់នូវ​លទ្ធិប្រជាធិបតេយ្យ សេរីពហុបក្ស គប្បី​បំពេញនូវ​កតព្វកិច្ច​នេះជាប្រចាំ៕អត្ថបទបាន ចក់