ភ្នំពេញ៖ ព្រឹទ្ធសភាជាតិ បានបញ្ចប់ការពិនិត្យ ហើយឲ្យយោបល់រួចរាល់ ទៅលើសេចក្តីព្រាងក្រមបរិស្ថាន និង​ធនធានធម្មជាតិ និងសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងពាណិជ្ជកម្មសេវាកម្មអាស៊ាន គឺបានឯកភាពទាំងស្រុង និងឥតកែប្រែ ក្នុង៦០សំឡេង នៃចំនួនសមាជិកព្រឹទ្ធសភាទាំងមូល ។

បន្ទាប់ពីសម័យប្រជុំលើកទី១០ នីតិកាលទី៤ ក្រោមអធិបតីភាពសម្តេចវិបុលសេនាភក្តី សាយ ឈុំ ប្រធាន​ព្រឹទ្ធសភា​ជាតិ នៅថ្ងៃទី១៣ ខែមិថុនា ឆ្នាំ២០២៣ ឯកឧត្តម ម៉ម ប៊ុននាង អ្នកនាំពាក្យព្រឹទ្ធសភា មានប្រសាសន៍ថា សេចក្តីព្រាង​ក្រមបរិស្ថាន និងធនធានធម្មជាតិ មានចំនួន១២គន្ថី និង៨៦៥មាត្រា នឹងជួយពង្រឹង និងធ្វើឱ្យប្រសើរ​ឡើង​បន្ថែម​ទៀត​ លើការគ្រប់គ្រងបរិស្ថាន កិច្ចគាំពារ អភិរក្ស និងការស្តារឡើងវិញនូវធនធានធម្មជាតិ ជីវៈចម្រុះ មុខងារប្រព័ន្ធ​អេកូឡូស៊ី និងការរស់នៅប្រកបដោយចីរភាព ដោយកំណត់ទិសដៅរួមជាយុទ្ធសាស្ត្រ សម្រាប់កិច្ចគាំពារបរិស្ថាន និងការអភិរក្សធនធានធម្មជាតិដល់ក្រសួង ស្ថាប័ន និងអាជ្ញាធរដែលមានសមត្ថកិច្ចពាក់ព័ន្ធ ។

ឯកឧត្តមបានបន្តថា សេចក្រីព្រាងច្បាប់នេះនឹងពង្រីកលទ្ធភាពយ៉ាងទូលំទូលាយដល់ក្រសួង ស្ថាប័ន និងមជ្ឈដ្ឋាន​ទាំងអស់ក្នុងការចូលរួមកាន់តែប្រសើរជាងមុន នៅក្នុងកិច្ចគាំពារបរិស្ថាន ការគ្រប់គ្រង និងការអភិរក្សធនធាន​ធម្មជាតិ ​និងជីវៈចម្រុះតាមរយៈការបង្កើត និងការគោរពនូវទំនាក់ទំនងនៃមុខងាររបស់ក្រសួង ស្ថាប័ន និងមជ្ឈដ្ឋាន​សង្គមទាំងអស់ ហើយបង្កើនប្រសិទ្ធភាព និងប្រសិទ្ធផលនៃការអនុវត្តបេសកកម្មគ្រប់គ្រង ការពារ អភិរក្ស និងស្តារ​ឡើងវិញនូវធនធានធម្មជាតិ ជីវៈចម្រុះ បេតិកភណ្ឌធម្មជាតិ និងវប្បធម៌ សំដៅធានាបាននូវ​ការអភិវឌ្ឍ​ប្រកបដោយ​ចីរភាព និងការចូលរួមថែរក្សានូវភាពរុងរឿង សម្រាប់ពលរដ្ឋកម្ពុជាគ្រប់ជំនាន់ ។

ឯកឧត្តម ម៉ម ប៊ុននាង បានបន្ថែមថា វានឹងផ្តល់ជាយន្តការជំរុញ និងលើកកម្ពស់ការយល់ដឹង និងការស្រាវជ្រាវ​អំពី​បរិស្ថានដល់គ្រប់មជ្ឈដ្ឋានសង្គមទាំងអស់ តាមរយៈការអប់រំ ការផ្សព្វផ្សាយ និងការបណ្តុះ-បណ្តាល​ទាំងយន្ត​ការ​ក្នុងប្រព័ន្ធ និងក្រៅប្រព័ន្ធ ដើរតួជាបទប្បញ្ញត្តិគោលមួយដ៏រឹងមាំសម្រាប់មន្រ្តីអនុវត្តច្បាប់ ជាពិសេសមន្រ្តីដែល​មាន​សមត្ថកិច្ចពាក់ព័ន្ធនឹងការបង្រ្កាបបទល្មើសបរិស្ថាន និងធនធានធម្មជាតិ ព្រម-ទាំងមន្រ្តីអនុវត្តច្បាប់នៃក្រសួង ស្ថាប័ន ឬអង្គភាពពាក់ព័ន្ធទាំងអស់ ។

ឯកឧត្តមអ្នកនាំពាក្យ លើកឡើងថា ចំណែកសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង​ពាណិជ្ជកម្មសេវាកម្មអាស៊ាន មានគោលបំណងសំខាន់ជាច្រើន មានជួយ ពង្រឹងការតភ្ជាប់សេដ្ឋកិច្ច និងការ​ផ្តល់កាលានុវត្តភាពកាន់តែប្រសើរឡើងសម្រាប់ការអភិវឌ្ឍសេដ្ឋកិច្ចនៅក្នុងសហគមន៍សេដ្ឋកិច្ចអាស៊ាន, បង្កើនការធ្វើពាណិជ្ជកម្ម និងការវិនិយោគលើវិស័យពាណិជ្ជកម្មសេវាកម្ម ដោយបង្កើតទីផ្សារ និងសេដ្ឋកិច្ចកាន់​តែទូលំទូលាយ ហើយកាត់បន្ថយការរឹតត្បិតចំពោះពាណិជ្ជកម្មសេវាកម្ម និងបង្កើតបរិយាកាសពាណិជ្ជកម្ម ដែលអាចព្យាករណ៍បាន​ ៕ អត្ថបទ ៖ បាន សុខរិទ្ធិ