យ៉េម៉ែន ៖ ក្រុមអាជ្ញាធរ បាននិយាយកាលពីថ្ងៃចន្ទថា ការផ្ទេរប្រេងដ៏ស្មុគស្មាញចេញពីនាវាដឹកប្រេង​ខ្នាតយក្ស​ពុកផុយ​របស់យេម៉ែន ជិតចាប់ផ្តើមហើយនៅពេលឥឡូវនេះ ពេលដែលការធានារ៉ាប់រងចំពោះប្រតិបត្តិការ ត្រូវបានបញ្ចប់ ។ 

អង្គការសហប្រជាជាតិ(UN)បានព្រមានអស់រយៈពេលជាច្រើនឆ្នាំមកហើយថា នាវាដឹកប្រេង FSO Safer អាចនឹងបែក ឬផ្ទុះនៅថ្ងៃណាមួយ ហើយវានឹងធ្លាយប្រេងចូលទៅក្នុងសមុទ្រក្រហម ចំនួន៤ដងច្រើនជាងគ្រោះមហន្តរាយនាវា​ដឹកប្រេង Exxon Valdezនៅជិតរដ្ឋ Alaska សហរដ្ឋអាមេរិក កាលពីឆ្នាំ ១៩៨៩ ។ 

នាវាដឹកប្រេង Safer ត្រូវបានចតចោលនៅជិតតំបន់ឆ្នេរប្រទេសយ៉េម៉ែន ចាប់តាំងពីឆ្នាំ ១៩៨៨រហូតមក ប៉ុន្តែ​ប្រតិបត្តិការ​ថែទាំនៅលើនាវា បានផ្អាកចាប់តាំងពីឆ្នាំ ២០១៥ ដោយសារតែសង្រ្គាមស៊ីវិលនៅក្នុងប្រទសមួយនេះ ។ 

យោងតាមការអះអាងរបស់កម្មវិធីអភិវឌ្ឍន៍អង្គការសហប្រជាជាតិ(UNDP) បានឲ្យដឹងថា ការធានារ៉ាប់រង នឹងក្លាយ​ជាចំណុចដ៏សំខាន់ ក្នុងការជំរុញប្រតិបត្តិការសង្រ្គោះឲ្យបន្តទៅបាន ។ 

សូមបញ្ជាក់ថា ប្រទេសយ៉េម៉ែន បានជាប់ផុងក្នុងជម្លោះចាប់តាំងពីក្រុមឧទ្ទាមហ៊ូធីគាំទ្រដោយអ៊ីរ៉ង់ ផ្តួលរំលំរដ្ឋាភិបាល​ទទួល​ស្គាល់ដោយអន្តរជាតិកាលពីឆ្នាំ ២០១៤ ៕