គម្រោងសាកល្បងមួយនៅក្នុងប្រទេសប៉េរូកំពុងប្រើប្រាស់រូបយន្តដើម្បីដាំគ្រាប់ពូជ ក្នុងការជួយដល់ការដាំដើមឈើឡើងវិញនៅតំបន់ព្រៃអាម៉ាហ្សូន ជាទីដែលព្រៃជប់ភ្លៀង និងជីវចម្រុះកំពុងរងការបំផ្លាញដោយការធ្វើអាជីវកម្មរ៉ែ និងការកាប់ឈើដោយខុសច្បាប់។
នៅមុនទិវាព្រៃឈើពិភពលោកនៅថ្ងៃទី ២២ ខែមិថុនា អង្គការមិនរកប្រាក់ចំណេញ Junglekeepers និយាយថា ការបញ្ចូនរូបយន្តដើម្បីចូលរួមក្នុងយុទ្ធនាការប្រយុទ្ធប្រឆាំងនឹងការបំផ្លិចបំផ្លាញព្រៃឈើអាចជាការផ្លាស់ប្តូរស្ថានការណ៍ដ៏មានប្រសិទ្ធភាពមួយ។
ក្រុមហ៊ុនផលិតរូបយន្ត ABB ដែលមានមូលដ្ឋាននៅទីក្រុង Zurich អះអាងថា នេះជាការប្រើប្រាស់រូបយន្តបញ្ជាពីចម្ងាយឆ្ងាយបំផុតមួយ។ រូបយន្តនេះត្រូវបានបំពាក់ដោយបន្ទះស្រូបពន្លឺព្រះអាទិត្យ និងភ្ជាប់ដោយប្រព័ន្ធអ៊ីនធើណេតឥតខ្សែផ្កាយរណបពន្លឺព្រះអាទិត្យ សម្រាប់ការបញ្ជាពីចម្ងាយពីមូលដ្ឋានក្រុមហ៊ុន ABB នៅប្រទេសស៊ុយអែត ដែលមានចម្ងាយ ១២.០០០ គីឡូម៉ែត្រពីតំបន់ព្រៃអាម៉ាហ្សូនប៉េរូ។
នាយកប្រតិបត្តិអន្តរជាតិអង្គការ Junglekeepers លោក Mohsin Kazmi បាននិយាយថា រូបយន្តនេះអាចដាំរុក្ខជាតិប្រហែល ៦០០ ដើមនៅពេលមួយព្រឹក ដែលស្មើនឹងទំហំផ្ទៃដីទីលានបាល់ទាត់ចំនួនពីរ។
ការការពារព្រៃអាម៉ាហ្សូន ជាទីដែលជនជាតិដើមភាគតិចរាប់លាននាក់រស់នៅ ត្រូវបានចាត់ទុកថាជាគន្លឹះក្នុងការប្រយុទ្ធប្រឆាំងនឹងបម្រែបម្រួលអាកាសធាតុ ដោយសារតែវាស្រូបយកបរិមាណឧស្ម័នកាបូនឌីអុកស៊ីតកំដៅផែនដីដ៏ច្រើនលើសលុប។ ព្រៃអាម៉ាហ្សូនគឺជាព្រៃជប់ភ្លៀងដ៏ធំបំផុតរបស់ពិភពលោក ហើយប្រទេសប៉េរូមានផ្នែកធំទីពីរនៃព្រៃអាម៉ាហ្សូននេះបន្ទាប់ពីប្រទេសប្រេស៊ីល៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
