អ្នកនេសាទរបស់ប្រទេសកូរ៉េខាងត្បូង ជាង៣ពាន់នាក់ បានមកប្រមូលផ្តុំគ្នា កាលពីថ្ងៃចន្ទនៅជិតអគាររដ្ឋសភា ក្នុងទីក្រុងសេអ៊ូល ដើម្បីតវ៉ាការបញ្ចេញទឹកមានសារធាតុពលវិទ្យុសកម្មតាមផែនការរបស់ប្រទេសជប៉ុន ពីរោងចក្រថាមពលនុយក្លេអ៊ែរ Fukushima Daiichi ដែលលែងដំណើរការ ចូលទៅក្នុងមហាសមុទ្រប៉ាស៊ីហ្វិក។
ក្រុមអ្នកនេសាទ បានកាន់សញ្ញាដែលសរសេរថា «ប្រឆាំងដាច់ខាតចំពោះការបញ្ចេញទឹកមានសារធាតុពុលវិទ្យុសកម្មនៅរោងចក្រ Fukushima ទៅក្នុងសមុទ្រ និងមហាសមុទ្រប៉ាស៊ីហ្វិក។
ក្រុមហ៊ុនផ្គត់ផ្គង់ថាមពលអគ្គិសនីក្រុងតូក្យូ (TEPCO) បានចាប់ផ្តើមប្រតិបត្តិការសាកល្បងកាលពីព្រឹកថ្ងៃចន្ទ លាយទឹកសាបនិងទឹកសមុទ្រ ដែលពុំមានផ្ទុកសារធាតុវិទ្យុសកម្ម ដើម្បីបញ្ជាក់ថាតើបរិក្ខារបញ្ចេញទឹកទៅសមុទ្រអាចធ្វើប្រតិបត្តិការដោយទុកចិត្តបានឬទេ។ ការសាកល្បងដំណើរការពីទីតាំងបញ្ចេញទឹក ត្រូវបានគេរំពឹងថា មានរយៈពេលប្រហែល២សប្តាហ៍។
សមាគមអ្នកនេសាទ បាននិយាយនៅក្នុងសេចក្តីថ្លែងការណ៍ថា រដ្ឋាភិបាលជប៉ុន គួរតែណែនាំនូវដំណោះស្រាយនានា រួមមានទាំងការស្តុកនៅលើដីរយៈពេលយូរប្រសើរជាជាងចាក់ចោលទឹកមានសារធាតុវិទ្យុសកម្ម ដែលនឹងបំផ្លាញជីវិតទាំងអស់នៅក្នុងមហាសមុទ្រប៉ាស៊ីហ្វិក និងការរស់នៅរបស់អ្នកនេសាទទាំងអស់ដែលពឹងអាស្រ័យលើការនេសាទ។
សមាគម បានទទូចឲ្យរដ្ឋាភិបាលកូរ៉េខាងត្បូង ដាក់បណ្តឹងបន្ទាន់ទៅកាន់តុលាការអន្តរជាតិ សម្រាប់ច្បាប់សមុទ្រលើប្រទេសជប៉ុន ដោយនិយាយថា ប្រសិនបើទឹកមានសារធាតុពុលត្រូវបានបញ្ចេញ វានឹងគំរាមដល់ជីវភាពរស់នៅរបស់អ្នកនេសាទ ក្នុងពេលមានការធ្លាក់ចុះខ្លាំងក្នុងតម្រូវការសម្រាប់ផលិតផលសមុទ្រ។
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
