អ៊ីស្រាអែល៖ គំនរបាក់បែក បានរាយប៉ាយពាសពេញដងផ្លូវនៅក្នុងតំបន់កាន់កាប់ហ្គាហ្សាស្ទ្រីប នាព្រឹកថ្ងៃអង្គារនេះ បន្ទាប់ពីការវាយប្រហារតាមច្រកអាកាសជាច្រើនលើករបស់អ៊ីស្រាអែល ស្របពេលដែលភាពតានតឹងកំពុងឡើងកម្ដៅខ្លាំង នៅក្នុងទីក្រុងហ្ស៊េរុយសាឡឹម និងការប៉ះទង្គិចគ្នាអស់រយៈពេលជាច្រើនថ្ងៃ នៅក្នុងបរិវេនព្រះវិហារពិសិដ្ឋ អាល់ អាក់សា។
មនុស្ស ២២នាក់ ដែលរួមទាំងកុមារ ០៩នាក់ បានស្លាប់ អំឡុងការវាយប្រហារតាមច្រកអាកាសទាំងយប់ នៅក្នុងតំបន់ហ្គាហ្សាស្ទ្រីប។
យោធាអ៊ីស្រាអែល បាននិយាយថា ជនស៊ីវិលអ៊ីស្រាអែល ៦នាក់ បានរងរបួសនៅព្រឹកថ្ងៃអង្គារនេះ ក្រោយពេលក្រុមជីវពលប៉ាឡេស្ទីន បាញ់គ្រាប់រ៉ុកកែតរាប់សិបគ្រាប់ ចេញពីតំបន់ហ្គាហ្សា ស្ទ្រីប។
អំពើហិង្សាដូចកាលពីមុននេះដែរ បង្កឡើងដោយសារតែជម្លោះដណ្ដើមទឹកដីនៅក្នុងទីក្រុងហ្ស៊េរុយសាឡឹម ដែលជាទីតាំងបូងសួងសំខាន់ៗរបស់សាសនាអ៊ីស្លាម សាសនាជនជាតិជីហ្វ និងសាសនាគ្រិស្ត។
មកទល់នឹងព្រឹកថ្ងៃអង្គារនេះ ក្រុមឧទ្ទាមហាម៉ាស់ និងក្រុមជីវពលតំបន់ហ្គាហ្សាផ្សេងទៀត បានបាញ់រ៉ុកកែតជាង ២០០គ្រាប់ ដែលគេជឿថា គឺជាការវាយប្រហារដោយរ៉ុកកែតលើកដំបូង មកលើទីក្រុងហ្ស៊េរុយសាឡឹម ចាប់តាំងពីសង្គ្រាមផ្ទុះឡើង កាលពីឆ្នាំ ២០១៤។
សារព័ត៌មានក្នុងស្រុក បានរាយការណ៍ថា នៅក្នុងតំបន់ហ្គាហ្សា ការវាយប្រហារដោយដ្រូនអ៊ីស្រាអែល បានសម្លាប់បុរសម្នាក់នៅទីក្រុងភាគខាងត្បូង ខាន់ យូនីស កាលពីព្រឹកមិញនេះ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
