ភ្នំពេញ៖ រាជរដ្ឋាភិបាលកម្ពុជា បានអនុញ្ញាតឱ្យប្រើប្រាស់ថាមពលពន្លឺព្រះអាទិត្យលើដំបូល ដែលជាសមិទ្ធិផលប្រវត្តិសាស្ត្រថ្មីមួយទៀតក្នុងវិស័យថាមពលកម្ពុជា ដើម្បីជួយគាំទ្រដល់កំណើនសេដ្ឋកិច្ច និងជីវភាព។
ក្នុងវេទិកាផ្សព្វផ្សាយប្រកាសស្ដីអំពី "គោលការណ៍សម្រាប់ការអនុញ្ញាតឱ្យប្រើប្រាស់ថាមពលពន្លឺព្រះអាទិត្យលើដំបូលនៅកម្ពុជា” នៅថ្ងៃទី ១៣ ខែ មិថុនា ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល លើកឡើងនៅថា ការអនុញ្ញាតឱ្យប្រើប្រាស់ថាមពលពន្លឺព្រះអាទិត្យលើដំបូលនៅកម្ពុជានាពេលនេះ ជាសមិទ្ធិផលប្រវត្តិសាស្ត្រថ្មីមួយទៀត ក្នុងវិស័យថាមពលកម្ពុជាសម្រាប់រាជរដ្ឋាភិបាលនៃព្រះរាជាណាចក្រកម្ពុជា ។ គោលការណ៍សម្រាប់ការអនុញ្ញាតឱ្យប្រើប្រាស់ថាមពលពន្លឺព្រះអាទិត្យលើដំបូលនៅកម្ពុជា ត្រូវបានរៀបចំឡើងដោយជោគជ័យក្រោមក្របខណ្ឌនៃជំនួយបច្ចេកទេស របស់កម្មវិធីអភិវឌ្ឍសហប្រជាជាតិ (UNDP)។
ឯកឧត្តម បានបញ្ជាក់ថា វិស័យថាមពលកម្ពុជា មិនត្រឹមតែមានភារកិច្ចត្រូវបន្តការអភិវឌ្ឍ ដើម្បីឆ្លើយតបតាមកំណើនតម្រូវការថាមពល គឺត្រូវធ្វើយ៉ាងណាឱ្យការផ្គត់ផ្គង់ថាមពលមួយមានគ្រប់គ្រាន់ អាចទុកចិត្តបាន និងមានថ្លៃកាន់តែសមរម្យ ដើម្បីជួយគាំទ្រដល់កំណើនសេដ្ឋកិច្ច និងជីវភាពប៉ុណ្ណោះទេ ប៉ុន្តែជាមួយគ្នានេះ ក្រសួងបានសម្រេចការអភិវឌ្ឍមួយប្រកបដោយចីរភាព ដោយប្រើប្រាស់ថាមពលកកើតឡើងវិញស្អាតផងដែរ។
ថាមពលពន្លឺព្រះអាទិត្យ គឺជាថាមពលកកើតឡើងវិញមួយដែលស្អាត មិនប៉ះពាល់ដល់បរិស្ថាន មិនរួមចំណែកបញ្ចេញឧស្ម័នផ្ទះកញ្ចក់ និងជាប្រភពធនធានដ៏មានសក្តានុពល សម្រាប់ការផលិតថាមពលអគ្គិសនីនៅក្នុងព្រះរាជាណាចក្រកម្ពុជា៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
