​ភ្នំពេញ៖ នៅថ្ងៃទី១៣ ខែមិថុនានេះ ឯកឧត្តម Yuji Kumamanru អតីតឯកអគ្គរាជទូតជប៉ុន ប្រចាំនៅកម្ពុជា បានដឹកនាំ អ្នកវិនិយោគទុនជប៉ុនចូលជួបពិភាក្សាការងារជារមួយ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ នៅទីស្តីក្រសួង។ ក្នុងជំនួបនេះឯកឧត្តម រដ្ឋមន្ត្រី ថោង ខុន បានគាំទ្រក្រុមហ៊ុនការីទេសចរណ៍ជប៉ុនបង្កើតការិយាល័យតំណាងនៅកម្ពុជា ។

​នៅក្នុងជំនួបនេះ ឯកឧត្តម រដ្ឋមន្ត្រី ថោង ខុន បានសម្តែងការអរគុណឯកឧត្តម Yuji Kumamanru អតីតឯកអគ្គរាជទូតជប៉ុន ប្រចាំនៅកម្ពុជា ដែលបានដឹកនាំអ្នកវិនិយោគទុនជប៉ុន មកបំពេញទស្សនកិច្ចសិក្សាស្វែងយល់ឱកាសវិនិយោគទុននៅកម្ពុជា រហូតធ្វើឲ្យក្រុមហ៊ុនការីទេសចរណ៍ប្រទេសជប៉ុនមួយចំនួនបានសម្រេចចិត្តបើកការិយាល័យតំណាងប្រចាំនៅកម្ពុជាបន្ថែមទៀត ដើម្បីជំរុញចលនាទេសចរណ៍កម្ពុជា ជប៉ុនមានកំណើនល្អប្រសើរឡើងវិញ និងការជំរុញការបើកជើងហោះហើរត្រង់ឡើងវិញរវាងកម្ពុជា ជប៉ុនឡើងវិញ។

ឯកឧត្តម ថោង ខុន បានស្នើឯកឧត្តម អតីតឯកអគ្គរាជទូតជប៉ុន ជួយស្នើក្រុមហ៊ុនអាកាសចរណ៍ ANA តភា្ជប់ជើងហោះហើរត្រង់ កម្ពុជា ជប៉ុន ឡើងវិញក្រោយបរិបទកូវិដធូរស្រាលឡើងវិញផងដែរ។

ឯកឧត្តម Yuji Kumamaru ថ្លែងថា ក្នុងអំឡុងពេលនាំអ្នកវិនយោគទុនបំពេញទស្សនកិច្ចសិក្សាស្វែងរកឱកាសវិនិយោគនៅកម្ពុជានេះ គឺមានក្រុមការីទេសចរណ៍ Japan Dream Tour ដែលមានការិយាល័យតំណាងចំនួន២៥ប្រទេស បានសម្រេចបង្កើតការិយាល័យតំណាងក្រុមហ៊ុនបន្ថែមទៀតនៅ ខេត្តសៀមរាប និងរាជធានីភ្នំពេញ ដើម្បីផ្សព្វផ្សាយគោលដៅទេសចរណ៍ និងនាំទេសចរពីជប៉ុន មកទស្សនាកម្ពុជា និងពីកម្ពុជាទៅទស្សនាប្រទេសជប៉ុនវិញដែរ​។

ឯកឧត្តម រំពឹងថា តាមរយៈការបើកការិយាល័យតំណាងក្រុមហ៊ុនការីទេសជប៉ុននៅកម្ពុជានេះ នឹងជំរុញកំណើនទេសចរកម្ពុជាជប៉ុនកាន់តែកើនឡើង ខណៈថ្មីៗនេះ រដ្ឋាភិបាលជប៉ុន បានសម្រេចបើកឱកាសឲ្យភ្ញៀវទេសចរកម្ពុជា គឺអាចធ្វើ E Visa ទិដ្ឋាការស្នាក់នៅប្រទេសជប៉ុនតាមប្រព័ន្ធអនឡាញ ខណៈរាជរដ្ឋាភិបាលកម្ពុជា ក៏បានបើកឱកាសភ្ញៀវទេសចរជប៉ុន អាចធ្វើE Visa ឬអាចធ្វើវីហ្សាពេលមកដល់កម្ពុជាផងដែរ៕ ​អត្ថបទ៖ ស៊ុម សុខជា