ភ្នំពេញ៖ នៅថ្ងៃទី១៣ ខែមិថុនា ឆ្នាំ២០២៣ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុក បេសកកម្មពិសេស អញ្ជើញសំណេះសំណាល និងជូនដំណើរសាសនិកឥស្លាម ទៅធ្វើបុណ្យហាជ្ជ នៅទីក្រុងម៉ាក្កះ ប្រទេសអារ៉ាប៊ីសាអូឌីត ខណៈគិតមកទល់ពេលនេះមានសានិកឥស្លាមជាង៧០០នាក់ហើយបានចេញពីកម្ពុជា។

នាឱកាសនោះ ឯកឧត្តមមានប្រសាសន៍ថា ការកើនឡើងនេះ ដោយសារនៅឆ្នាំ២០២៣ ស្ថានភាពជំងឺកូវីដ១៩ មានការធូរស្បើយ គ្មានការរីតបន្តឹងអាយុអ្នកចូលរួមធ្វើបុណ្យហាជ្ជ ហើយអារ៉ាប៊ីសាអូឌីតបានបង្កើនចំនួនកូតា អ្នកចូលរួមធ្វើបុណ្យនេះនៅទូទាំងពិភពលោក ក្នុងនោះក៏មានកម្ពុជាផងដែរ។

ជាពិសេសទៀតនោះ ឯកឧត្តមបានរំលេចថា នេះគឺជាសញ្ញាមួយ ដែលសរបញ្ជាក់ឱ្យឃើញថា សព្វថ្ងៃ សាសនិកឥស្លាម កម្ពុជា ក៏ដូចជាប្រជាពលរដ្ឋទូទាំងប្រទេស ទទួលបាននូវជីវភាពធូរធារ និងការវិវត្តស្ថានភាព រស់នៅរបស់ ខ្លួនឆ្ពោះទៅ មុខ ជាបន្តបន្ទាប់ ដែលជាចំណែកមួយនៃការកើនឡើងនៃសេដ្ឋកិច្ចជាតិ ក្រោមការដឹកនាំ ប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជណាចក្រកម្ពុជា ដែលបានធ្វើឲ្យប្រទេស ជាតិមានសុខសន្តិភាព និងអភិវឌ្ឍន៍លើគ្រប់វិស័យ។

ជាចុងក្រោយ ឯកឧត្តមក៏បានមានប្រសាសន៍ផ្តាំផ្ញើ និងការជូនពរដល់បណ្តាអ្នកដែលអញ្ជើញទៅបំពេញកាតព្វកិច្ច បុណ្យហាជ្ជនាថ្ងៃនេះ ព្រមទាំងអ្នកចេញដំណើរជាបន្តបន្ទាប់ សូមប្រកបដោយ សេចក្តីសុខសុវត្ថិភាព និងបំពេញ កាតព្វកិច្ច របស់ខ្លួនគ្រប់លក្ខណៈ តាមក្បួនច្បាប់ របស់សាសនាឥស្លាម។

កាលពីថ្ងៃទី៨ ខែមិថុនា ឆ្នាំ២០២៣ សាសនិកឥស្លាមបានចេញដំណើរ៨៦នាក់សម្រាប់ជើងទី១ ដឹកនាំដោយ ក្រុមហ៊ុន ជី យ៉ាគ្រុប ក្នុងនោះដែរទៅជាលក្ខណៈឯកជនចំនួន ៥៦នាក់ និងទទួលបានការឧបត្ថម្ភពីអង្គការ សមាគមនានា។

គួរបញ្ជាក់ថា ការទៅចូលរួមប្រតិបត្តិបុណ្យហាជ្ជ គឺជាកាតព្វកិច្ចទី៥ ក្នុងចំណោមកាតព្វកិច្ចទាំង៥របស់ សាសនាឥស្លាម ដែលជារៀងរាល់ឆ្នាំ សាសនិកឥស្លាម នៅទូទាំងពិភពលោកពីគ្រប់ទិស ទីអញ្ជើញទៅប្រារព្វបុណ្យ នេះនៅឯទីក្រុងម៉ាក្កះ ប្រទេសអារ៉ាប៊ីសាអូឌីត៕ ដោយ ÷ ឧត្តម