ភ្នំពេញ៖ វេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម បានឲ្យដឹងថា សកម្មភាព​នៃការបរិច្ចាគឈាមមនុស្សធម៌នៅកម្ពុជា កំពុងមានការចូលរួមពីប្រជាពលរដ្ឋកើនឡើង ពីមួយឆ្នាំទៅមួយឆ្នាំ ហើយជំនាញក៏កំពុងខិតខំ ជាមួយនិងការប្ដេជ្ញាចិត្តខ្ពស់ ក្នុងការទប់ស្កាត់នូវអំពើជួញដូរឈាម ពីសំណាក់ជនឆ្លៀតឱកាស ។

ក្នុងពិធីអបអរសាទរទិវាពិភពលោក នៃអ្នកបរិច្ចេគឈាម ក្រោមប្រធានបទ “ផ្ដល់ឈាម ផ្ដល់ប្លាស្មា” នៅថ្ងៃទី១៤ ខែមិថុនា ឆ្នាំ២០២៣ លោកវេជ្ជបណ្ឌិត សុខ ប៉ូ លើកឡើងថា នៅកម្ពុជាពីមួយឆ្នាំ​ទៅ​មួយឆ្នាំ តម្រូវការឈាមមានការកើនឡើងពី ១៥ទៅជិត២០ភាគរយ ជាមួយនឹងការតម្រូវ​របស់​អង្គការសុខភាពពិភពលោក (WHO) ក្នុងប្រទេសនីមួយៗត្រូវមានឈាម ១ភាគរយ នៃចំនួនរបស់ប្រជាពលរដ្ឋសរុប ។

លោកវេជ្ជបណ្ឌិត បានបន្តថា សម្រាប់កម្ពុជា មានពលរដ្ឋជាង ១៧លាននាក់ ដូចនេះក៏ត្រូវមានអ្នកត្រូវបរិច្ចាគឈាមចំនួនប្រមាណ ១សែន៧ម៉ឺនាក់ ក្នុងមួយឆ្នាំៗ ប៉ុន្តែបច្ចុប្បន្នមានត្រឹមប្រមាណ ៦០ភាគរយប៉ុណ្ណោះ មិនឆ្លើយតបនឹងតម្រូវការ បើទោះបីអ្នកនាំចូលរួមបរិច្ចាគកើនឡើង ។

វេជ្ជបណ្ឌិត សុខ ប៉ូ បានបញ្ជាក់ថា ការបរិច្ចាគឈាមមានអត្ថប្រយោជន៍៣សំខាន់ គឺទី១. កាត់បន្ថយជំងឺមហារីក លំហូរឈាមរត់ក្នុងខ្លួន កាត់បន្ថយការខ្វះជាតិដែក..., ទី២. ជាការបង្ហាញនូវក្ដីស្រឡាញ់ និងទី៣. ទទួលបាននូវបុណ្យកុសលច្រើន ពីការបរិច្ចាគនេះ ។

សម្រាប់ប្រជាពលរដ្ឋបរិច្ចាគឈាម បានបង្ហាញនូវការសប្បាយរីករាយ ដែលបានចូលរួមក្នុងការ​ងារមនុស្សធម៌ លើវិស័យសុខាភិបាល ​ដោយពួកគាត់ចាត់ទុកថា ឈាមរបស់ខ្លួន បានជួយ​សង្គ្រោះជីវិតមនុស្សបានទាន់ពេលវេលា ។

ក្នុងឱកាសនោះ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បាន សម្ដែង​នូវការគាំទ្រ និងអបអរសាទ ចំពោះសកម្មភាពបរិច្ចាគឈាមរបស់ពលរដ្ឋនេះ គឺពិតជា​បានធ្វើនូវអំពើល្អ ដើម្បីចូលរួមជួយសង្គ្រោះជីវិតមនុស្ស ​ខណៈបច្ចុប្បន្ននេះ ចលនានៃការ​ចូលរួមបរិច្ចាគឈាម កំពុងបង្កើននូវវប្បធម៌ដ៏ល្អមួយ ៕អត្ថបទ បាន សុខរិទ្ធិ