ភ្នំពេញ៖ នៅព្រឹកថ្ងៃទី១៤ ខែមិថុនានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បើកកិច្ចប្រជុំក្រុមការងាររាជរដ្ឋាភិបាល និងឯកជន ស្តារនិងលើកស្ទួយវិស័យទេសចរណ៍ក្រោយកូវីដ១៩ ស្តីពីការរៀបចំសេចក្តីព្រាងការរៀបចំផែនការយុទ្ធសាស្ត្រជាតិអភិវឌ្ឍន៍ទេសចរណ៍២០២៣-២០៣៥ ដែលមានគោលបំណងទាក់ទាញចំណូលGDPសរុបឲ្យបាន៤០ពាន់លានដុល្លាអាមេរិក និងបង្កើតការងារផ្ទាល់ឲ្យបាន ១លាន៦សែននាក់ នៅឆ្នាំ២០៣៥។

ឯកឧត្តមរដ្ឋមន្ត្រី ថោង ខុន ថ្លែងថា ដើម្បីគាំទ្រដំណើរឆ្ពោះទៅកាន់អនាគតការរីកចំរើន កាន់តែ​ប្រសើរឡើង ក្នុងវិស័យទេសចរណ៍ គឺចាំបាច់កម្ពុជាត្រូវតែរៀបចំផែនការយុទ្ធសាស្ត្រជាតិ​អភិវឌ្ឍន៍​ទេសចរណ៍២០២៣ - ២០៣៥ ដែលក្នុងផែនការយុទ្ធសាស្ត្រនេះ ត្រូវជំរុញឲ្យខេត្ត និងតំបន់ គោលដៅទេសចរណ៍​បង្កើន​ការ​អភិរក្ស និង អភិរក្សមានសុវត្ថិភាព ស្អាត ឆ្លាត និងបៃតង ជាពិសេសជំរុញវិស័យទេសចរណ៍ផ្សារភ្ជាប់​ ការនាំចេញ នៅនឹងកន្លែង និងការទទួលផល​ប្រយោជន៍​ពីវិស័យទេសចរណ៍ឲ្យបានច្រើនថែមទៀត​ ក្នុងភាពជាខ្មែរ។

ឯកឧត្តម រដ្ឋមន្ត្រី បញ្ជាក់ថា នៅក្នុងសេចក្តីព្រាងផែនការយុទ្ធសាស្ត្រជាតិអភិវឌ្ឍន៍​វិស័យ​ទេសចរណ៍២០២៣ - ២០៣៥នេះ គឺមានដាក់ចេញនូវគោលដៅយុទ្ធសាស្ត្រ ៣រួមមាន៖ ទី១ការលើកកម្ពស់ប្រកួតប្រជែងទេសចរណ៍ ទី២ ការលើកកម្ពស់និរន្តភាពទេសចរណ៍ ទី៣ ការលើកកម្ពស់បរិយាបន្នទេសចរណ៍ ​ជាពិសេស​ ការគិតគូឈរលើទស្សនៈ មិនទុកចោល​នរណាម្នាក់​ស្ថិតនៅក្រៅអភិវឌ្ឍន៍ និងការលើកកកម្ពស់សេដ្ឋកិច្ចទេសចរណ៍ក្រៅប្រព័ន្ធ។

ឯកឧត្តមរដ្ឋមន្ត្រី ថោង ខុន ថ្លែងថា ក្នុងរយៈពេល ​៥ខែដើមឆ្នាំ២០២៣ កម្ពុជា ទទួលបាន​ភ្ញៀវទេសចរ​អន្តរជាតិ បានប្រមាណជាង ២លាន១សែននាក់ កើនជាង​៥៣០%ធៀប​រយៈពេលដូចគ្នាឆ្នាំ២០២២។

ដោយឡែកសម្រាប់ទេសចរក្នុងស្រុកវិញ គឺមានប្រមាណ ១០លាននាក់ ហើយរហូតដល់​ដំណាច់ឆ្នាំ២០២៣នេះ ទេសចរក្នុងស្រុកនឹងកើនដល់១៦លាននាក់ ហើយនឹងទេសចរអន្តរជាតិ​ នឹងមកទស្សនាកម្ពុជា កើនរហូតដល់៤លាន ​៧សែននាក់ ហើយឆ្នាំ២០២៥ ទេសចរអន្តរជាតិ​មកទស្សនាកម្ពុជា នឹងកើនដល់៧លាននាក់។

ឯកឧត្តម រដ្ឋមន្ត្រី ថ្លែងថា នៅក្នុងឱកាសដែលកម្ពុជារៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាមហ្គេម ​គឺមានប្រជាជនបណ្តាប្រទេសលើពិភពលោក ចូលទស្សនាតាមអនឡាញ​ប្រមាណ២៨ពាន់លាននាក់ ​ដែលតាមរយៈការរៀបចំព្រឹត្តិការណ៍ប្រកួតកីឡានេះ គឺបានធ្វើឲ្យ​ប្រជាជន​លើពិភពលោកស្គាល់កម្ពុជា ហើយគេអាចនឹងមកទស្សនាកម្ពុជា​ ដោយផ្ទាល់កាន់តែ​ច្រើនឡើងៗនៅឆ្នាំបន្តបន្ទាប់ទៀតនេះ៕ អត្ថបទ ស៊ុម សុខជា