ភ្នំពេញ ៖ ឯកឧត្តម ស្រី សួន រដ្ឋលេខាធិការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង​ សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានអៈអាងថា  ការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ គឺជាបញ្ហាសកលដែលពិភពលោកកំពុងតែយកចិត្តទុកដាក់ និងរួមគ្នាដើម្បីបង្ការ ទប់ស្កាត់ និងឆ្លើយតបការ​រំលោភបំពានក្នុងបរិបទប្រព័ន្ធបច្ចេកវិទ្យាព័ត៌មាននេះ។

​ការថ្លែងរបស់ឯកឧត្តម ស្រី សួន យ៉ាងដូច្នេះក្នុងពិធីបើកសិក្ខាសាលាស្ដីពី “កិច្ចការពារកុមារពីការកេងប្រវ័ញ្ចផ្លូវភេទ​លើកុមារតាមប្រព័ន្ធអនឡាញ” នៅសាលាមធ្យមវិចិត្រសិល្បៈ ព្រឹកថ្ងៃទី១៤ ខែមិថុនា ឆ្នាំ២០២៣នេះ។

ឯកឧត្តម ស្រី សួន រដ្ឋលេខាធិការ បានបន្តទៀតថា កម្ពុជា ក៏ជាប្រទេសមួយដែលបានបោះជំហានទៅមុខ ក្នុងការ​ចូលរួមចំណែកសំដៅធ្វើឲ្យកាន់តែប្រសើរឡើងនូវការលើកកម្ពស់កិច្ចការពារកុមារ និងឧត្តមប្រយោជន៍​របស់កុមារ​គ្រប់រូប។ ក្រោយពីព្រះរាជាណាចក្រកម្ពុជា បានផ្តល់សច្ចាប័នលើអនុសញ្ញាស្ដីពីសិទ្ធិកុមារ នៅថ្ងៃទី១៥ ខែតុលា ឆ្នាំ១៩៩២ និងលើពិធីសារបន្ថែមនៃអនុសញ្ញាសិទ្ធិកុមារ ស្តីពីការជួញដូរកុមារ ការធ្វើពេស្យាកម្មកុមារ និងរូបភាព​អាសអាភាសកុមារ ព្រមទាំងពិធីសារបន្ថែម ស្តីពីការចូលរួមរបស់កុមារនៅក្នុងជម្លោះ ប្រដាប់អាវុធ នៅថ្ងៃទី២១ ខែកុម្ភៈ ឆ្នាំ២០០២រួចមក រាជរដ្ឋាភិបាលកម្ពុជា បានបន្តអនុវត្តយ៉ាងខ្ជាប់ខ្ជួននូវបទដ្ឋានទាំងនោះ ដោយ​ខិតខំ​ដាក់បញ្ចូលខ្លឹមសារពាក់ព័ន្ធទៅក្នុងច្បាប់គោលនយោបាយ ផែនការនានា សំដៅពង្រឹងកិច្ចការពារកុមារ​ពីភាព​រងគ្រោះ​ទាំងឡាយឲ្យកាន់តែល្អប្រសើរ។

ឯកឧត្តម រដ្ឋលេខាធិការ បានបញ្ជាក់ទៀតថា ក្រោមការដឹកនាំប្រកបដោយគតិ​បណ្ឌិតរបស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សេដ្ឋកិច្ច វប្បធម៌ និង​សង្គមជាតិ ត្រូវបានស្តារ និងអភិវឌ្ឍរហូតធ្វើឲ្យសម្រេច​កំណើនសេដ្ឋកិច្ចគួរឲ្យកត់​សម្គាល់ក្នុងពីរទសវត្សរ៍ចុ​ងក្រោយ​នេះ ហើយប្រទេសនានាក្នុងតំបន់និងលើពិភពលោក ទទួលស្គាល់នូវជំហានរីកចម្រើន​ឈានឡើង​យ៉ាងឆាប់រហ័ស​របស់ព្រះរាជាណាចក្រកម្ពុជា ដោយបានបង្កើតនូវឱកាសជាច្រើនថែមទៀត ក្នុងការកសាងនិងអភិវឌ្ឍប្រទេស។ យុទ្ធសាស្ត្រចតុកោណដំណាក់កាលទី៤បានជំរុញឲ្យការវិភាជន៍ធនធានបន្ថែមដល់វិស័យអប់រំ សុខាភិបាល សង្គមកិច្ច និងវិស័យផ្សេងៗទៀត ដែលក្នុងនោះការអភិវឌ្ឍកុមារ គឺជាអាទិភាពមួយនៃការកសាង​ធនធានមនុស្ស​សម្រាប់ការអភិវឌ្ឍជាតិ និងសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាព២០១៦-២០៣០។ ទន្ទឹមនឹងនេះ កម្ពុជាបានត្រៀមខ្លួនជាស្រេចក្នុងការចូលរួមក្នុងបដិវត្តឧស្សហកម្ម ៤ចុច០ ដែលផ្តោតជាពិសេស​លើវិស័យបច្ចេកវិទ្យា ដែលពិភពលោកកំពុងប្រើប្រាស់​ជាមធ្យោបាយសម្រាប់វិស័យនយោបាយ សេដ្ឋកិច្ច វប្បធម៌ និងសង្គមកិច្ច យ៉ាងមានប្រសិទ្ធភាព។ ការរីកចម្រើនផ្នែកបច្ចេកវិទ្យាព័ត៌មាន បានកំចាត់នូវភាព​អសកម្មជំរុញ​ដល់ការរីកលូតលាស់ ការងារ នយោបាយ សេដ្ឋកិច្ច និងសង្គមកិច្ច ដែលធ្វើឱ្យកម្ពុជាមានទំនាក់ទំនង​ជាមួយ​បណ្ដាប្រទេសក្នុងតំបន់ និងពិភពលោកថែមទៀតផង ជាមួយគ្នានោះដែរ។

លោកជំទាវ ឆឹង ស៊ីមន រដ្ឋលេខាធិការ ក្រសួងវប្បធម៌ និងវិចិត្រសិល្បៈ បានលើកឡើងថា វគ្គបណ្តុះបណ្តាល​នាពេលនេះ រៀបចំឡើងក្នុងគោលបំណងដើម្បីលើកកម្ពស់ការយល់ដឹងអំពីគោល​នយោបាយជាតិ​ស្តីពី​ប្រព័ន្ធកិច្ចការពារ​កុមារ និងកិច្ចការពារកុមារពីការកងប្រវ័ញ្ច និងការរំលោភ បំពានផ្លូវភេទតាមប្រព័ន្ធអនឡាញ ដល់លោកគ្រូ អ្នកគ្រូ និងសិស្សានុសិស្ស នៃសាលាមធ្យមវិចិត្រសិល្បៈ៕ អត្ថបទ ៖ រដ្ឋា​