សកម្មជនក្នុងតំបន់ម្នាក់និយាយថា ការសម្រេចចិត្តបញ្ចេញចូលទៅមហាសមុទ្រនូវទឹកមានសរធាតុពុលនុយក្លេអ៊ែរនៅរោងចក្រ​ផ្គត់ផ្គង់​ថាមពល នុយក្លេអ៊ែរ Fukushima Daiichi ដែលលែងដំណើរការ ធ្វើឡើងដោយប្រតិបត្តិកររបស់រោងចក្រក្រុមហ៊ុនផ្គត់ផ្គង់ថាមពលអគ្គិសនីក្រុងតូក្យូ (TEPCO)និងរដ្ឋាភិបាលជប៉ុន នឹងនាំមកនូវការបំផ្លាញដល់តំបន់ទាំងមូល។

សកម្មជនលោកស្រី Oda Chiyo រស់នៅក្នុងក្រុង Iwaki ជាទីក្រុងមួយ មានចម្ងាយប្រហែល៥០គីឡូម៉ែត្រពីរោងចក្រអគ្គិសនីដែលមិនដំណើរការនេះ ហើយលោកស្រី​បានចូលរួមក្នុងការតវ៉ាជាបន្តបន្ទាប់នៅក្នុងតំបន់ បន្ទាប់ពីរដ្ឋាភិបាលជប៉ុន បានប្រកាសជាផ្លូវការ នូវផែនការបញ្ចេញទឹកមានសារធាតុពុលចូលទៅមហាសមុទ្រនៅថ្ងៃទី១៣ ខែមេសា ឆ្នាំ២០២១។

រយៈពេលជាង២ឆ្នាំ ពលរដ្ឋក្នុងតំបន់បានរៀបចំការតវ៉ាដោយស្ម័ក្រចិត្តនៅថ្ងៃទី១៣ រៀងរាល់ខែប្រឆាំងការសម្រេចចិត្តដោយខ្វះការពិចារណា។ ទោះជាយ៉ាងណា រដ្ឋាភិបាលជប៉ុន និងក្រុមហ៊ុនផ្គត់ផ្គង់អគ្គិសនី TEPCO មិនអើពើចំពោះការស្នើសុំនោះទេ​និងបានបន្តដំណើរ​ទៅ​មុខជាក់ស្តែងចំពោះប្រតិបត្តិការសាកល្បងដែលទាក់ទងសម្រាប់ការបញ្ចេញទឹកមានសារធាតុពុលចោល។

របាយការណ៍របស់ក្រុមហ៊ុន TEPCO បានបង្ហាញថា សារធាតុវិទ្យុសកម្មលើត្រីនៅមហាសមុទ្រ​ដែលចាប់បាននៅកំពង់ផែនៃរោងចក្រថាមពលមានលើសកម្រិតសុវត្ថិភាព​សម្រាប់ការ​ប្រើប្រាស់​របស់មនុស្ស ដោយមានចំណុះស៊ីស្យូម Cs-137 ដែលឈានដល់១៨០ដង ​នៃអតិបរមាស្តង់ដារ ដែលបានចែងក្នុងលក្ខខណ្ឌក្នុងច្បាប់សុវត្ថិភាពចំណីអាហាររបស់ប្រទេសជប៉ុន ដែលបង្ក​ឲ្យអង្គការនានាព្រួយបារម្ភ ​ចំពោះការបញ្ចេញទឹកមានសារធាតុពុលចូលទៅក្នុងសមុទ្រ។