ព្រៃវែង ៖ ឯកឧត្តម ឡោ សុឡេង អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកស្វាយអន្ទរនិងកញ្ច្រៀច និងជាប្រធានក្រុមការងារចល័តទាំងពីរស្រុក នៅព្រឹកថ្ងៃទី១៤ ខែមិថុនា ឆ្នាំ២០២៣នេះ បានអញ្ជើញបញ្ចុះ​បឋម​សិលាសាងសង់អគារសិក្សា២ខ្នង ដោយមួយខ្នងជាអំណោយរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងមួយខ្នងទៀតជាអំណោយរបស់នាយឧត្តមសេនីយ៍សន្តិបណ្ឌិតនេត សាវឿន។

ថ្លែងក្នុងឱកាសនោះ ឯកឧត្តម ឧត្តមសេនីយ៍ឯក ឡោ សុឡេង លើកឡើងថាក្រោយពិនិត្យឃើញថា វិទ្យាល័យ ហ៊ុន សែន ពានរោង មានកំណើនសិស្សពីមួយឆ្នាំទៅមួយឆ្នាំហើយមានការខ្វះខាតនូវអគារសិក្សា ដូច្នេះទើបថ្នាក់ដឹកនាំ​សម្រេចផ្ដល់ជូនជាអំណោយអគារសិក្សាចំនួន ២ខ្នងបន្ថែមទៀត ដើម្បីបណ្ដុះបណ្ដាលនូវ​ធនធានមនុស្ស​បម្រើឲ្យ​ផល​ប្រយោជន៍ជាតិទាំងមូល។

ឯកឧត្តម បានបន្តថា បច្ចុប្បន្ននេះប្រទេសកម្ពុជា មានសមិទ្ធផលសំខាន់ៗមួយចំនួន ដែលកើតមាន​ឡើងជា​បន្ដបន្ទាប់​នៅទូទាំងប្រទេសនិយាយជារួម និងនិយាយដោយឡែក នៅក្នុងមូលដ្ឋានឃុំពានរោង ក៏ដូចជា​នៅ​ស្រុកស្វាយអន្ទរនេះតែម្ដង ក្នុងនោះមានទាំងប្រព័ន្ធហេដ្ឋារចនាសម្ព័ន្ធផ្លូវថ្នល់ វិស័យអប់រំ និង​វិស័យសុខាភិ​បាល​ជាច្រើន។ សមិទ្ធផលជាច្រើនទៀត នឹងកើតឡើងជាបន្ដបន្ទាប់ក្រោមម្លប់នៃសុខសន្ដិភាព និងការ​អភិវឌ្ឍ​ឥតឈប់​ឈររបស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា។

បន្ទាប់ពីអញ្ជើញបញ្ចុះបឋមសិលាសាងសង់អគារសិក្សាខាងលើនេះ ឯកឧត្តម ឡោ សុឡេងក៏បានអញ្ជើញ​ចុះពិនិត្យ​ការសាងសង់អគារសិក្សាមួយខ្នងទៀត ដែលជាអំណោយរបស់ នាយឧត្តមសេនីយ៍ នេត សាវឿន នៅ​សាលាបឋម​សិក្សា នេត សាវឿន មានជ័យ ស្ថិតក្នុងឃុំចុងអំពិល ស្រុកកញ្រ្ជៀច ខេត្តព្រៃវែងផងដែរ។

សូមបញ្ជាក់ថាក្នុងឱកាសនោះដែរ ឯកឧត្តម ឡោ សុឡេង ក៏បានឧបត្ថម្ភថវិកាមួយចំនួន ដែលជា​អំណោយ​របស់​នាយឧត្តមសេនីយ៍ នេត សាវឿន ក្នុងនោះ ជូនសាលាស្រុកស្វាយអន្ទរ ចំនួន ១លានរៀល, ការិយាល័យ​អប់រំស្រុក ចំនួន ១លានរៀល, គណៈកម្មការទ្រទ្រង់សាលា នាយក លោកគ្រូ អ្នកគ្រូ ចំនួន ១លាន ៥០ម៉ឺនរៀល, អាជ្ញាធរ ភូមិ ឃុំ ចំនួន ៥០ម៉ឺនរៀល, ប៉ុស្ដិ៍នគរបាលរដ្ឋបាលពានរោង ចំនួន ៥០ម៉ឺនរៀល, សិស្សានុសិស្សចំនួន ១៥០នាក់ ម្នាក់ ១ម៉ឺនរៀល, ក្រុមជាងចំនួន ៣០នាក់ ម្នាក់ ២ម៉ឺនរៀល និងចំណាយការរៀបចំពិធីចំនួន ៥លានរៀល សរុបអស់​ថវិកាចំនួន ១១,៦០០,០០០រៀល៕ អត្ថបទ ៖ បានចក់