អ៊ុយក្រែន ៖- អ៊ុយក្រែននិយាយថា មនុស្ស៦នាក់បានស្លាប់ ក្នុងការវាយប្រហារដោយមីស៊ីលរបស់រុស្ស៊ី ហើយបុគ្គលិកបានបោសសម្អាតអំបែងដែលនៅរាយប៉ាយនៅជុំវិញអគារដែលបានឆេះ។

យោធានិងមន្ត្រីក្នុងតំបន់របស់អ៊ុយក្រែន បាននិយាយនៅព្រឹកថ្ងៃពុធនេះថា មីស៊ីលរបស់រុស្ស៊ី បានធ្លាក់ទៅលើអគារជនស៊ីវិលនៅទីក្រុងកំពង់ផែសមុទ្រខ្មៅ Odesa របស់អ៊ុយក្រែនកាលពីពេលយប់ បណ្តាលឲ្យមនុស្សយ៉ាងហោចណាស់៦នាក់ស្លាប់។ 

ទីបញ្ជាការភាគខាងត្បូង នៃកងកម្លាំងប្រដាប់អាវុធអ៊ុយក្រែន បាននិយាយថា រុស្ស៊ីបានបាញ់មីស៊ីល​តម្រង់គោលចំនួន៤គ្រាប់មកលើទីក្រុង Odesa ។

យោធានិយាយនៅពេលដំបូងថា មីស៊ីល២គ្រាប់ ត្រូវបានបំផ្លាញមុនពេលធ្លាក់លើគោលដៅរបស់វា។

ទីបញ្ជាការភាគខាងត្បូងនិយាយនៅលើកម្មវិធីផ្ញើរសារលើបណ្តាញ Telegram ថា ការប្រយុទ្ធតាមដែនអាកាស និងការបំផ្ទុះជាបន្តបន្ទាប់ បានបំផ្លាញមជ្ឈមណ្ឌលពាណិជ្ជកម្ម វិទ្យស្ថានអប់រំ បរិវេណពលរដ្ឋរស់នៅ គ្រឹះស្ថានលក់អាហារ និងហាងទំនិញ នៅភាគកណ្តាលទីក្រុង។

យោធានិយាយថា មនុស្ស៣នាក់បានស្លាប់ ដែលកំពុងធ្វើការនៅឃ្លាំងទំនិញលក់រាយមួយ​កន្លែងនៅពេល​នោះមីស៊ីលបានធ្លាក់ បង្កើតឲ្យមានអណ្តាតភ្លើង ហើយមនុស្ស៧នាក់ផ្សេងទៀតបានរងរបួស។