កូរ៉េខាងត្បូង ៖ ក្រសួងបង្រួបបង្រួមរបស់ប្រទេសកូរ៉េខាងត្បូង បានឲ្យដឹង នៅថ្ងៃពុធ (ទី១៤ ខែមិថុនា) នេះថា ក្រសួងបានដាក់ពាក្យបណ្តឹងទាមទារសំណង ប្រឆាំងនឹងប្រទេសកូរ៉េខាងជើង ជុំវិញការកម្ទេចការិយាល័យ​ទំនាក់ទំនងអន្តរកូរ៉េឆ្នាំ២០២០ ពីសំណាក់ទីក្រុងព្យុងយ៉ាង នៅទីក្រុង Kaesong ព្រំដែនកូរ៉េខាងជើង។

យោងតាមក្រសួងនេះ បានឲ្យដឹងថា រដ្ឋាភិបាលបានដាក់ពាក្យបណ្តឹងទៅតុលាការ​កណ្ដាលទីក្រុង​សេអ៊ូលប្រឆាំងនឹងសាធារណរដ្ឋប្រជាមានិតប្រជាធិបតេយ្យកូរ៉េ ឬកូរ៉េខាងជើង ទាមទារសំណង ៤៤,៧ពាន់លានវ៉ុន (៣៥លានដុល្លារអាមេរិក) សម្រាប់ការខូចខាត ដែលបានកើតមានចំពោះទ្រព្យសម្បត្តិរដ្ឋរបស់កូរ៉េខាងត្បូង។

នៅថ្ងៃទី១៦ ខែមិថុនា ឆ្នាំ២០២០ ប្រទេសកូរ៉េខាងជើងបានបំផ្ទុះការិយាល័យទំនាក់ទំនងរួម នៅទីក្រុង Kaesong ដោយសារមានកំហឹង ចំពោះទីក្រុងសេអ៊ូល ដែលមិនអាចបញ្ឈប់អ្នកធ្វើចំណាកស្រុកកូរ៉េខាង​ជើងពីការ​បញ្ជូនខិត្តបណ្ណប្រឆាំងទីក្រុងព្យុងយ៉ាងឆ្លងកាត់ព្រំដែន។

នេះគឺជាលើកដំបូងហើយ ដែលរដ្ឋាភិបាលកូរ៉េខាងត្បូងបានប្តឹងកូរ៉េខាងជើង។ ចំណាត់ការផ្លូវច្បាប់ បានកើតឡើង ខណៈលក្ខន្តិកៈនៃការកំណត់បរិមាណសម្រាប់ការខូចខាតទ្រព្យសម្បត្តិទាក់ទងនឹងសំណុំរឿងនេះ ត្រូវផុតកំណត់នៅថ្ងៃសុក្រ។ យោងតាមច្បាប់រដ្ឋប្បវេណី លក្ខន្តិកៈនៃការកំណត់បរិមាណ សម្រាប់សិទ្ធិទាមទារសំណង នឹងមានសុពលភាពរយៈពេលបីឆ្នាំ បន្ទាប់ពីការខូចខាតកើតឡើង៕