អង់គ្លេស ៖ ក្រុមគ្រួសារដែលបានបាត់បង់សាច់ញាតិក្នុងអំឡុងពេលជំងឺរាតត្បាតកូវីដ១៩ បានធ្វើបាតុកម្ម​មួយ​កាល​ពីថ្ងៃអង្គារ (១៣ មិថុនា) ខណៈដែលការស៊ើបអង្កេតរបស់ចក្រភពអង់គ្លេសលើការ​ដោះស្រាយ​របស់រដ្ឋាភិបាល​អំពីជំងឺនេះបានចាប់ផ្តើមសវនាការសំខាន់របស់ខ្លួន។

ក្រុមបាតុកររាប់សិបនាក់ ដែលស្លៀកសម្លៀកបំពាក់ពណ៌ក្រហម ដើម្បីឆ្លុះបញ្ចាំងឲ្យឃើញពីបេះដូង​ពណ៌​ក្រហម​នៅលើស្លាកអនុស្សាវរីយ៍កូវីដ បានឈរនៅខាងក្រៅអគារ Dorland Houseក្នុងទីក្រុងឡុងដ៍ ដោយ​កាន់រូបថត​សមាជិកគ្រួសាររបស់ពួកគេដែលបានស្លាប់ក្នុងអំឡុងពេលជំងឺរាតត្បាតនេះ។

អតីតនាយករដ្ឋមន្ត្រីលោក បូរីស ចនសុន បានបញ្ជាឱ្យបើកការស៊ើបអង្កេតដើម្បីពិនិត្យ​មើលការត្រៀម​ខ្លួនរបស់ចក្រភពអង់គ្លេស ក៏ដូចជាការឆ្លើយតបផ្នែកសុខភាពសាធារណៈ និងសេដ្ឋកិច្ច បន្ទាប់ពីចក្រភពអង់គ្លេស​ជាប្រទេសមានចំនួនអ្នកស្លាប់ខ្ពស់បំផុតមួយក្នុងចំណោមប្រទេសផ្សេងទៀតរបស់ពិភពលោក​ដោយ​សារជំងឺកូវីដ។

ចំនួនអ្នកស្លាប់ជាង ១៧៥.០០០ នាក់ដោយសារវីរុសនេះ ត្រូវបានរាយការណ៍ថានៅគ្រាដែលលោក​អតីតនាយករដ្ឋមន្ត្រី ចនសុន បានចុះចេញពីតំណែងកាលពីខែកក្កដាឆ្នាំមុន៕