ក្រុមអ្នកកាន់ទុក្ខបានប្រមូលផ្តុំគ្នានៅទីលានចតុរង្គ Piazza Duomo ទីក្រុងមីឡាន ប្រទេសអ៊ីតាលី នៅព្រឹកថ្ងៃពុធ (១៤ មិថុនា)នេះ មុនពេលពិធីបុណ្យសពរបស់អតីតនាយករដ្ឋមន្ត្រីលោក Silvio Berlusconi ។

កងកម្លាំងសន្តិសុខត្រូវបានគេដាក់ពង្រាយនៅខាងក្រៅព្រះវិហារធំមួយជាទីដែលពិធីនេះនឹងត្រូវធ្វើឡើង ដោយសាងសង់រនាំងដើម្បីរៀបចំសណ្ដាប់ធ្នាប់ហ្វូងមនុស្ស។ មនុស្ស​រាប់ពាន់នាក់ ត្រូវបានគេរំពឹងថានឹងចូលរួមក្នុងពីធីបុណ្យសពនេះ។

នាយករដ្ឋមន្ត្រីអ៊ីតាលីបច្ចុប្បន្នលោកស្រី Giorgia Meloni និងប្រធានាធិបតីអ៊ីតាលីលោក Sergio Mattarella ស្ថិតក្នុងចំណោមអ្នកចូលរួម​ពិធីបុណ្យសព​ដែលនឹង​ប្រព្រឹត្ត​ទៅនៅថ្ងៃ​កាន់ទុក្ខជាតិ ដោយមានដាក់ទង់ជាតិនៅពាក់កណ្តាលដងរបស់អគារសាធារណៈទាំងអស់។

លោក Berlusconi បានទទួលមរណភាពកាលពីថ្ងៃច័ន្ទ (១២ មិថុនា) ក្នុងវ័យ ៨៦ ឆ្នាំ គឺរយៈពេលបីថ្ងៃបន្ទាប់ពីចូលមន្ទីរពេទ្យ San Raffaele នៅទីក្រុងមីឡាន ជាទីដែលលោកបាន​ចំណាយ​ពេលមួយខែកន្លះរាប់ពីខែមេសាដល់ឧសភា ដើម្បីព្យាបាលការឆ្លងមេរោគសួត និងស្ថានភាពរ៉ាំរ៉ៃនៃជំងឺមហារីកឈាម៕