ភ្នំពេញ៖ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និង ឯកឧត្តម អ៊ុណូ អាត់ស៊ូស៊ី (UENO Astushi) ឯកអគ្គរាជទូតជប៉ុន និងលោក សានុអ៊ិ កាហ្សូម៉ាសា (SANUI Kazumasa) ប្រធានJICAប្រចាំកម្ពុជា បានចុះពិនិត្យអគារមន្ទីរ ពិសោធន៍ជាតិសំណង់ និង ស្ថានីយវាស់វែងអចិន្ត្រៃយ៍ដោយប្រើផ្កាយរណប។ក្នុងដំណើរចុះពិនិត្យនេះ មន្ទីរពិសោធន៍ជាតិសំណង់ បានរៀបចំបង្ហាញប្រភេទសរសៃដែក ដែល និយមប្រើប្រាស់ក្នុងវិស័យសំណង់នៅប្រទេសកម្ពុជា អនុវត្តពិសោធន៍ផ្ទាល់ការទាញសរសៃដែក ដោយប្រើ ប្រាស់ម៉ាស៊ីនជប៉ុន និងអនុវត្តពិសោធន៍ផ្ទាល់ការសង្កត់រកកម្លាំងបេតុង ដោយប្រើប្រាស់ម៉ាស៊ីនពិសោធន៍ ជប៉ុន។
ឧបករណ៍ និងម៉ាស៊ីនពិសោធន៍ ដែលជាជំនួយរបស់រដ្ឋាភិបាលជប៉ុន មាន២០មុខ ក្នុងកញ្ចប់ ថវិកាចំនួន២៥០លានយ៉េន ស្មើនឹង២,៣លានដុល្លារ ដោយចែកជាពីរដំណាក់កាលក្នុងការផ្គត់ផ្គង់ដល់ មន្ទីរពិសោធន៍ជាតិសំណង់ គឺការផ្គត់ផ្គង់លើកទីមួយ ម៉ាស៊ីន និងឧបករណ៍ពិសោធន៍ ចំនួន៤គ្រឿង ក្នុង នោះមានម៉ាស៊ីនសង្កត់បេតុង ម៉ាស៊ីនសង្កត់កម្លាំងស៊ីម៉ង់ ម៉ាស៊ីនទាញដែក និងម៉ាស៊ីនតេស្តគ្រឿងផ្គុំសំ ណង់ ក្នុងកញ្ចប់ថវិកា ចំនួនជាង១៣១លានយ៉េន ដោយបានដំឡើង និងអនុវត្តសាកល្បង ចាប់ពីចុងខែ មេសា ឆ្នាំ២០២៣។ ចំពោះការផ្គត់ផ្គង់លើកទី២ មានម៉ាស៊ីន និងឧបករណ៍ពិសោធន៍ ចំនួន១៦មុខទៀត ក្នុងកញ្ចប់ថវិកាជាង៨៦លានយ៉េន ដែលគ្រោងនឹងដឹកជញ្ជូនមកដល់ប្រទេសកម្ពុជា ក្នុងរយៈពេល៥៥ សប្តាហ៍ទៀត បន្ទាប់ពីចុះកិច្ចសន្យា។ ដោយឡែក ចំពោះស្ថានីយវាស់វែងអចិន្ត្រៃយ៍ដោយប្រើផ្កាយរណប (CORS) គឺគម្រោងអភិវឌ្ឍស្ថានីយ CORS (ខស) មាន៥ទីតាំង ពីឆ្នាំ២០២២ ដល់ឆ្នាំ២០២៣ នៅរាជ ធានីភ្នំពេញ ខេត្តសៀមរាប ស្ទឹងត្រែង ស្រុកស្អាង នៃខេត្តកណ្តាល និងស្រុកសំរោងទង នៃខេត្តកំពង់ស្ពឺ ដែលគម្រោង នឹងបញ្ចប់នៅចុងឆ្នាំនេះ។ ក្នុងគោលបំណងបន្តនិរន្តរភាព និងផ្សារភ្ជាប់លើការអនុវត្តទៅនឹង គម្រោងពង្រីកការសាងសង់ស្ថានីយ៍CORS ចំនួន៩៤ស្ថានីយទូទាំងប្រទេស ក្រោមហិរញ្ញប្បទានឥតសំ ណង របស់រដ្ឋាភិបាលជប៉ុន ដែលជំនួយនេះនឹងចាប់ផ្តើមនៅចុងឆ្នាំ២០២៤ តាមរយៈកិច្ចប្រជុំក្រុមអនុវត្ត គម្រោង លើកទី៤ នៅខែឧសភា ឆ្នាំ២០២៣ អគ្គនាយកដ្ឋានសុរិយោដី និងភូមិសាស្ត្រ បានស្នើសុំភាគី JICAបន្តពន្យាពេល១ឆ្នាំបន្ថែមទៀត និងកំពុងរង់ចាំការសម្រេចជាផ្លូវការពីJICAនៅខែកក្កដា ឆ្នាំនេះ ។
ឯកឧត្តម ជា សុផារ៉ា បានវាយតម្លៃខ្ពស់ចំពោះកិច្ចសហការកន្លងមក រវាងភាគីជប៉ុន និងក្រសួង និងបានថ្លែងអំណរគុណដល់ភាគីជប៉ុន ដែលបានផ្ដល់សម្ភារៈជាជំនួយហិរញ្ញប្បទានឥតសំណង សម្រាប់ មន្ទីរពិសោធន៍ជាតិសំណង់កម្ពុជា និងកសាងស្ថានីយវាស់វែងអចិន្ត្រៃយ៍ដោយប្រើផ្កាយរណប សម្រាប់ជា ប្រយោជន៍ប្រើប្រាស់ក្នុងវិស័យសំណង់ និងការចុះបញ្ជី ដីធ្លីនៅព្រះរាជាណាចក្រកម្ពុជា៕ អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
