ភ្នំពេញ៖ នៅល្ងាចថ្ងៃទី១៤ ខែមិថុនានេះ ប្រតិភូជាន់ខ្ពស់ បណ្តាប្រទេសចំនួន៣២ រួមទាំងដៃគូអង្គការទេសចរណ៍ពិភពលោកនៃអង្គការសហប្រជាជាតិ ហៅកាត់UNWTO មកពីតំបន់អាស៊ីខាងកើត ខាងត្បូង និងនៅអាស៊ីប៉ាស៊ីភិច បានអញ្ជើញមកដល់រាជធានីភ្នំពេញអស់ហើយ ដើម្បីចូលរួមកិច្ចប្រជុំUNWTO លើកទី៣៥ នៃគណៈកម្មការតំបន់អាស៊ីខាងកើតនិងប៉ាស៊ីហ្វិក និងកិច្ចប្រជុំពាក់ព័ន្ធ ដែលកម្ពុជាធ្វើម្ចាស់ផ្ទះ។
នៅក្នុងកម្មវិធីអាហារសាមគ្គីនៅសណ្ឋាគារសុខា រាជធានី ភ្នំពេញ ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា ថ្លែងថា ក្នុងនាមជាម្ចាស់ផ្ទះរៀបចំកិច្ចប្រជុំរួមលើកទី៣៥នៃគណៈកម្មការតំបន់អាស៊ីខាងកើតនិង ប៉ាស៊ីហ្វិក និងគណៈកម្មការតំបន់អាស៊ីខាងត្បូងនៃUNWTO និង កិច្ចប្រជុំគណៈកម្មការតំបន់អាស៊ីខាងកើតនិងប៉ាស៊ីហ្វិក លើកទី៥៥, កិច្ចប្រជុំគណៈកម្មការ តំបន់អាស៊ីខាងត្បូង អមដោយសន្និសីទអង្គការទេសចរណ៍ពិភពលោកស្តីពីក្រមអន្តរជាតិសម្រាប់ការការពារទេសចរ និងកិច្ចប្រជុំតុមូលសមាជិកសម្ព័ន្ធអង្គការទេសចរណ៍ពិភពលោក ចាប់ពីថ្ងៃទី១៥-១៧ ខែមិថុនា ឆ្នាំ២០២៣នេះ គឺកម្ពុជា សូមថ្លែងអំណរគុណ និងសូមស្វាគមន៍យ៉ាងកក់ក្តៅចំពោះវត្តមានរបស់អគ្គលេខាធិការអង្គការទេសចរណ៍ពិភពលោកWTO និងប្រទេសសមាជិកទាំងអស់ដែលបានជ្រើសរើស និងគាំទ្រកម្ពុជាធ្វើជាម្ចាស់ផ្ទះនៃប្រព្រឹត្តការណ៍ថ្ងៃនេះ ។
ឯកឧត្តម រដ្ឋមន្ត្រី ថ្លែងថា នៅក្នុងកិច្ចប្រជុំក្របខ័ណ្ឌUNWTOនេះ គឺមាន រដ្ឋមន្ត្រី អនុរដ្ឋមន្ត្រីទេសចរណ៍ អ្នកជំនាញទេសចរណ៍ ក៏ដូចជាគណៈប្រតិភូថ្នាក់ដឹកនាំអង្គការ សមាគមន៍ជាដៃគូ បានក៏បានអញ្ជើញចូលរួម កិច្ចប្រជុំពាក់ព័ន្ធនានា ជាពិសេសសន្និសីទUNWTOស្តីពីក្រមអន្តរជាតិសម្រាប់ការការពារទេសចរ ដែលជាគំនិតផ្តួចផ្តើមរបស់កម្ពុជាផងដែរ។
ឯកឧត្តម រដ្ឋមន្ត្រី ថោង ខុន ថ្លែងថា តាមរយៈកម្មវិធីពិសាអាហារនាពេលនេះដែរ នឹងជំរុញការរឹតចំណងសាមគ្គីភាព កិច្ចសហប្រតិបត្តិការរវាងប្រទេសសមាជិក និងអង្គការដៃគូនានា ឲ្យកាន់តែប្រសើរឡើង ដើម្បីស្តារ និងអភិវឌ្ឍទេសចរណ៍ប្រកបដោយចីរភាព បរិយាប័ន្ន និងមានភាពធន់កាន់តែប្រសើរឡើង ហើយ ឯកឧត្តម សង្ឃឹមថា ភ្ញៀវកិត្តិយសទាំងអស់ទទួលបាននូវអារម្មណ៍រីករាយ អនុស្សាវរីយ៍ល្អៗ និងមិនអាចបំភ្លេចបានអំពីកម្ពុជា ជាពិសេសទឹកដីរាជធានីភ្នំពេញដ៏បវរនេះ៕ អត្ថបទ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
