ភ្នំពេញ៖ ឯកឧត្ដម ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានបញ្ជាក់ជុំវិញការធ្វើវិសោធនកម្មច្បាប់បោះឆ្នោត ​គឺដើម្បីកែទម្រង់ «សិទ្ធិឈរឈ្មោះឱ្យគេបោះឆ្នោត» ។

ឯកឧត្តម ជិន ម៉ាលីន មានប្រសាសន៍ប្រាប់ទូរទស្សន៍ BTV ទាក់ទងនឹងការធ្វើកែទម្រង់សិទ្ធិ​ក្នុងការ​ឈរឈ្មោះឱ្យគេបោះឆ្នោតនេះចំពោះការរៀបចំធ្វើការកែទម្រង់ «សិទ្ធិឈរឈ្មោះឱ្យគេបោះឆ្នោត» គឺធ្វើឡើងក្នុងគោលបំណងដើម្បីពង្រឹង ​និងលើកកម្ពស់ការទទួលខុសត្រូវរបស់មេដឹកនាំទាំងនៅ​ថ្នាក់ជាតិទាំងនៅថ្នាក់ក្រោមជាតិ ។

ឯកឧត្ដមបន្តថា អ្នកដែលមានបំណងចង់ឈរឈ្មោះឱ្យគេបោះឆ្នោត ត្រូវមានការទទួលខុសត្រូវក្នុង​នាមជាពលរដ្ឋល្អរបស់ជាតិ ក្នុងសង្គមប្រជាធិបតេយ្យ ដោយចាប់ផ្តើមពីការអនុវត្តឱ្យបាន​ខ្ជាប់ខ្ជួន​នូវសិទ្ធិបោះឆ្នោត។ ក្នុងន័យនេះអ្នកដែលមិនបានទៅបោះឆ្នោត ដោយគ្មានហេតុផលសមរម្យ​តាមផ្លូវច្បាប់ នឹងត្រូវចាត់ទុកថា បានបាត់បង់នូវលក្ខខណ្ឌក្នុងការឈរឈ្មោះឱ្យគេបោះឆ្នោត។ ប៉ុន្តែអ្នកនោះនៅតែមានសិទ្ធិទៅបោះឆ្នោត ក្នុងនាមជាពលរដ្ឋដដែលដោយមិនមានប៉ះពាល់​អ្វីទាំងអស់។

ឯកឧត្ដម បានបញ្ជាក់ថា ការធ្វើវិសោធនកម្មច្បាប់នេះ ក៏ជាផ្នែកមួយនៃការកែទម្រង់ «សិទ្ធិក្នុងការ​ឈរឈ្មោះឱ្យគេបោះឆ្នោត» នៅក្នុងដំណើរការប្រជាធិបតេយ្យ ដើម្បីឱ្យអនាគត​មេដឹកនាំ ដែលត្រូវ​ជ្រើសរើសតាមរបបបោះឆ្នោត​ ទាំងនៅថ្នាក់ជាតិ ទាំងនៅថ្នាក់ក្រោមជាតិ មានការទទួលខុសត្រូវ​ជាងមុនក្នុងនាមជាពលរដ្ឋល្អរបស់ជាតិនៅក្នុងសង្គមប្រជាធិបតេយ្យ​ ហើយការកែទម្រង់នេះ គឺ មិន​ប៉ះពាល់ដល់ «សិទ្ធិបោះឆ្នោត» ឡើយ។

សូមជម្រាបថាក្រសួងមហាផ្ទៃ និងក្រសួងយុត្តិធម៌​ ដោយទទួលបានភារកិច្ចពីសម្ដេចតេជោ ហ៊ុន សែន ​នាយកដ្ឋមន្រ្ដីនៃកម្ពុជា ក្នុងការរៀបចំធ្វើវិសោធនកម្មច្បាប់បោះឆ្នោតនេះ ​​ពិសេសត្រង់មាត្រា ៣៤ ថ្មី (មួយ)​ ដែលចែងក្នុងកថា ខណ្ឌចុងក្រោយថា «បទប្បញ្ញត្តិដកសិទ្ធិបោះឆ្នោត និងសិទ្ធិឈរឈ្មោះឱ្យគេបោះឆ្នោតត្រូវចែងក្នុងច្បាប់»ឱ្យបានមុនការបោះឆ្នោតនីតិកាលទី៧ ឆ្នាំ២០២៣នេះ៕ អត្ថបទ៖ សេក ឧត្ដម