រដ្ឋសភាអ៊ីស្រាអែល បានបង្កើតឲ្យមាននូវផលប៉ះពាល់ដ៏គួរឲ្យភ្ញាក់ផ្អើលមួយដល់រដ្ឋាភិបាលចម្រុះរបស់លោកនាយករដ្ឋមន្ត្រី Benjamin Netanyahu កាលពីថ្ងៃពុធ (ទី១៤ ខែមិថុនា) ដោយការសម្រេចជ្រើសរើសសមាជិកគណបក្សប្រឆាំងមួយរូបឲ្យអង្គុយកៅអីរបស់គណៈកម្មាធិការដែលចាត់តាំងចៅក្រម ពោលគឺជាក្រុមស្នូលនៃសមរភូមិនយោបាយលើប្រព័ន្ធយុត្តិធម៌របស់ប្រទេសអ៊ីស្រាអែល។

ប្រធានសភា Knesset លោក Amir Ohana បានប្រកាសថា លោកស្រី Karine Elharrar មកពីគណបក្សនិយមកណ្ដាល Yesh Atid ទទួលបានកៅអីមួយ ក្នុងចំណោមកៅអីគណៈកម្មាធិការចំនួនពីរ ប៉ុន្តែលោកស្រី Tally Gotliv មកពីគណបក្ស Likud របស់លោក Netanyahu មិនទទួលបានទេ ដោយទុកផ្លូវឲ្យមានការបោះឆ្នោតមួយផ្សេងទៀត សម្រាប់កៅអីទីពីរ ក្នុងរង្វង់ ៣០ថ្ងៃ។

ការបោះឆ្នោតនេះ ត្រូវបានគេមើលឃើញថា ជាផ្លូវនាំទៅរកកិច្ចពិភាក្សា រវាងលោក Netanyahu និងក្រុមគណបក្សប្រឆាំង ជុំវិញកំណែទម្រង់ច្បាប់ និងជាការសាកល្បង ចំពោះការដឹកនាំរបស់លោកលើរដ្ឋាភិបាលចម្រុះស្តាំនិយម ដែលគ្រប់គ្រងអាសនៈចំនួន៦៤ ក្នុងចំណោមអាសនៈចំនួន ១២០របស់រដ្ឋសភា Knesset។

កិច្ចចរចាសម្របសម្រួល ត្រូវបានចាប់ផ្តើមភ្លាមៗ បន្ទាប់ពីលោក Netanyahu កាលពីខែមីនា បានផ្អាក ការជំរុញដ៏ចម្រូងចម្រាសពីរដ្ឋាភិបាលរបស់លោក ក្នុងការផ្លាស់ប្តូរប្រព័ន្ធតុលាការ ដែលបានបង្កឲ្យមានការតវ៉ាមិនធ្លាប់មានពីមុនមក ដោយសារអ្នករិះគន់បានហៅការប៉ុនប៉ងនេះថា ជាការគំរាមកំហែងដល់លទ្ធិប្រជាធិបតេយ្យរបស់អ៊ីស្រាអែល៕