យោងតាមប្រភព ដែលដឹងពីការជំនុំជម្រះរឿងក្ដីរបស់តុលាការទីក្រុងញូវយ៉ក (New York) សហរដ្ឋអាមេរិក បានឲ្យដឹងថា គណៈវិនិច្ឆ័យរបស់ទីក្រុងនេះ កាលពីថ្ងៃពុធ (ទី១៤ ខែមិថុនា) បានបោះឆ្នោតចោទប្រកាន់លោក Daniel Penny ដែលជាអតីតពលបាលទាហានម៉ារីនអាមេរិក ពីបទមនុស្សឃាត កាលពីខែមុនលើលោក Jordan Neely ដែលជាជនអនាថាមួយរូប ដោយការក្រៀកក នៅក្នុងហេតុការណ៍ ដែលកើតឡើងលើរថភ្លើងក្រោមដី ក្នុងសង្កាត់ Manhattan។

លោក Penny វ័យ ២៤ឆ្នាំ ត្រូវបានចាប់រូបភាព នៅក្នុងវីដេអូដែលថតដោយអ្នកឈរក្បែរ កំពុងក្រៀកករបស់លោក Neely កាលពីថ្ងៃទី១ ខែឧសភា ខណៈពេលដែលពួកគេជិះលើរថភ្លើង F នៅសង្កាត់ Manhattan។ ការសម្លាប់នេះ បានទាក់ទាញការចាប់អារម្មណ៍ទូទាំងប្រទេស និងបង្កឲ្យមានការតវ៉ា នៅក្នុងខែឧសភា ដោយអ្នកដែលមានការខឹងសម្បានឹងការពន្យារពេលរបស់នគរបាល ក្នុងការចាប់ខ្លួនជនជាតិស្បែកសលោក Penny ពីបទសម្លាប់លោក Neely ដែលជាជនជាតិស្បែកខ្មៅ។

អ្នកដែលដឹងពីករណីនេះ ក្នុងលក្ខខណ្ឌមិនបញ្ចេញឈ្មោះដោយសារតែពួកគេមិនត្រូវបានអនុញ្ញាតឲ្យនិយាយជាសារធារណៈ បានប្រាប់ថា ក្នុងការបង្ហាញខ្លួននៅឯតុលាការជាលើកដំបូង កាលពីខែមុន លោក Penny ត្រូវបានចោទប្រកាន់មួយករណីពីបទមនុស្សឃាតកម្រិតទីពីរ ហើយការចោទប្រកាន់ ឬបទចោទប្រកាន់នានា នៅក្នុងដីការបស់គណៈវិនិច្ឆ័យ នឹងមិនត្រូវបានបិទបាំងទេ រហូតដល់លោក Penny បង្ហាញខ្លួននៅតុលាការ នាពេលសក្រោយ។

លោក Penny ត្រូវបានតុលាការកាត់ទោស កាលថ្ងៃទី១២ ខែឧសភា នៅតុលាការព្រហ្មទណ្ឌសង្កាត់ Manhattan ក្រោមបទចោទប្រកាន់មនុស្សឃាតកម្រិតទីពីរ ជាបទឧក្រិដ្ឋ ដែលអាចត្រូវបានកាត់ទោសឲ្យជាប់ពន្ធនាគាររហូត ១៥ឆ្នាំ។ លោកចៅក្រម Kevin McGrath បានដោះលែងលោក Penny ដោយបង់ប្រាក់ធានាចំនួន ១០០.០០០ដុល្លារ ហើយបានបញ្ជាឲ្យជនជាប់ចោទប្រគល់លិខិតឆ្លងដែនរបស់ខ្លួន និងត្រឡប់មកកាន់តុលាការវិញ នៅថ្ងៃទី១៧ ខែកក្កដា៕