តេក្វាន់ដូ៖ កីឡាករ-កីឡាការិនីកីឡាតេក្វាន់ដូ WT កម្ពុជា ០២រូបនឹងចាកចេញទៅចូលរួមការប្រកួតវគ្គជម្រុះកីឡាតេក្វាន់ដូ WT ដើម្បីរកកៅអីអូឡាំពិកទីក្រុងតូក្យូ នៅប្រទេសហ្សកដានីថ្ងៃអាទិត្យនេះ។
លោក ឆយ យ៉ុងស៊ុក គ្រូបង្វឹកជម្រើសជាតិ WT បានមានប្រសាសន៍ថា រូបលោក និងកីឡាករ វ៉ា មិថុនា នឹងធ្វើដំណើរចេញពីប្រទេសកម្ពុជានាថ្ងៃទី១៦ ខែឧសភា ឆ្នាំ២០២១ វេលាម៉ោង ១១.៥៥នាទីយប់ នឹងទៅដល់កន្លែងប្រកួតវគ្គជម្រុះកីឡាតេក្វាន់ដូ WT ផ្លូវការនាថ្ងៃទី១៨ ខែឧសភា ឆ្នាំ២០២១ វេលាម៉ោង ១០យប់ ព្រោះជំងឺ COVID-19 ធ្វើឱ្យជើងហោះហើរមួយចំនួនត្រូវសម្រាក គ្រាន់តែលោក និងកីឡាកររង់ចាំជើងហោះហើរនៅប្រទេសកូរ៉េខាងត្បូងរយៈពេល ១៩ម៉ោង ហើយពេលទៅដល់ប្រលានយន្តហោះប្រទេសហ្សកដានី ក៏បន្តដំណើរទៅកន្លែងប្រកួតទៀត។ លោកបន្តថា មកដល់ពេលនេះគូប្រកួតរបស់កីឡាការិនី ថិប កាសាន់ទ្រីនីកូល និង វ៉ា មិថុនា មិនទាន់ដឹងថា មានកីឡាករ-កីឡាការិនីប៉ុន្មាននាក់ចូលរួមទេ យ៉ាងណាថ្ងៃទី១៩ ឬ២០ ទើបដឹង ពីព្រោះកីឡាករ វ៉ា មិថុនា ប្រកួតនៅថ្ងៃទី២១ រីឯ ថិប កាសាន់ទ្រីនីកូល ប្រកួតនៅថ្ងៃទី២២ ខែឧសភា។
ពេលនេះនៅតែទ្វីបអាស៊ីមួយទេ ដែលមិនទាន់រកបានកីឡាករ-កីឡាការិនីទៅចូលរួមការប្រកួតតាមរយៈជម្រុះ ហើយកីឡាករ-កីឡាការិនីទាំងអស់ត្រូវប្រកួតលើ ៤ប្រភេទទម្ងន់ផ្សេងគ្នា ដោយក្នុងមួយប្រកួតទម្ងន់យកកីឡាករ ២នាក់ និងកីឡាការិនី ២នាក់។ ចំពោះកីឡាការិនី ថិប កាសាន់ទ្រីនីកូល នឹងធ្វើដំណើរពីសហរដ្ឋអាមេរិកទៅប្រទេសហ្សកដានីតែម្តង ដូច្នេះពួកគេនឹងជួបលោកគ្រូបង្វឹក ឆយ យ៉ុងសុក និងកីឡាករ វ៉ា មិថុនា នៅទីនោះ។ កម្ពុជាបញ្ជូនគ្រូបង្វឹក និងកីឡាករ-កីឡាការិនីចំនួន ៤នាក់រួមមានលោក ឆយ យ៉ុងសុក ជាគ្រូបង្វឹក, លោកគ្រូ Tubbs Gregory Allan ជាគ្រូជំនួយ ចំណែកកីឡាការិនី ថិប កាសាន់ទ្រីនីកូល កូនខ្មែររស់នៅសហរដ្ឋអាមេរិក ប្រកួតក្នុងប្រភេទទម្ងន់ក្រោម ៥៧គីឡូក្រាម និងកីឡាករ វ៉ា មិថុនា ប្រកួតក្នុងប្រភេទទម្ងន់ក្រោម ៨០គីឡូក្រាម៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
