ភ្នំពេញ៖ កម្ពុជាដោយមានក្រសួងការងារ បណ្ដុះបណ្ដាលវិជ្ជាជីវៈជាសេនាធិការបានរៀបចំ ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៦ ឆ្នាំ២០២៣។ ទិវានេះរៀបចំឡើងរយៈពេលពីរថ្ងៃ គឺថ្ងៃទី ១៥ និងថ្ងៃទី១៦ ខែមិថុនា ឆ្នាំ២០២៣នេះ ក្រោមប្រធានបទ “TVET ផ្តល់ជំនាញ និងការងារសមរម្យ”។

ឯកឧត្តម អ៊ិត សំហេង រដ្ឋមន្ត្រី ក្រសួងការងារ និងបណ្តុះបណ្តាលវិជ្ជាជីវៈ ក្នុងឱកាសបើកទិវាជាតិ​អប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៦នេះ បានលើកឡើងថា TVET ជាវិស័យមួយ​ក្នុងចំណោមវិស័យអាទិភាពផ្សេងទៀត ​ដែលរួមចំណែកយ៉ាងសកម្ម ក្នុងការកសាង​មូលធនមនុស្ស​ប្រកបដោយចំណេះដឹង សមត្ថភាព ជំនាញ ​ឥរិយាបទការងារ ​និងសីលធម៌វិជ្ជាជីវៈ ដើម្បីក្លាយ​ជាពលករជំនាញ និងអ្នកបច្ចេកទេស​ បំពេញតាមតម្រូវការកម្លាំងពលកម្មក្នុងទីផ្សារការងារ​នាពេលបច្ចុប្បន្ន ​និងអនាគត។

ផ្សាភ្ជាប់នឹងការលើកឡើងរបស់រដ្ឋមន្រ្តី គ្រឹះស្ថានសិក្សាបណ្ដុះបណ្ដាលបច្ចេកទេស និងវិជ្ជាជីវៈ ក៏បានលើកឡើងដែរថា ការសិក្សាលើជំនាញវិជ្ជាជីវៈ គឺពិតជាមានឱកាសការងារច្រើន នាពេលបច្ចុប្បន្ន។ លើសពីនេះ ​គឺជាការផ្ដល់ឱកាសជាច្រើន​ ការសិក្សាដោយមិនគិតថ្លៃ សម្រាប់​សិស្សមានជីវភាពក្រីក្រ ទាំងជាប់និងធ្លាក់បាក់ឌុប។

ខណៈចូលរួមក្នុងទិវាជាតិថ្ងៃនេះ និស្សិតដែលកំពុងសិក្សាលើជំនាញ TVET មើលឃើញដែរថា ឱកាសទីផ្សារការងារសម្រាប់ពួកគេពិតជាមានច្រើន។ ពួកគេលើកឡើងថា បណ្ដាក្រុមហ៊ុនជាច្រើន បានសហការជាមួយសាលា ដើម្បីផ្ដល់ការងារដល់និស្សិត ​ហើយនិស្សិតខ្លះ ក៏អាចបង្កើតមុខរបរ​ដោយផ្ទាល់ខ្លួនផងដែរ។

តាមការបញ្ជាក់បន្ថែមរបស់ រដ្ឋមន្រ្តីក្រសួងការងារ គឺថា បច្ចុប្បន្ននៅកម្ពុជាមានគ្រឹះស្ថាន​បណ្តុះ​បណ្តាលចំនួន ៣២៥។ ក្នុងឆ្នាំ២០២២ មានសិក្ខាកាម សិស្ស និស្សិតបានបញ្ចប់ការសិក្សា​គ្រប់កម្រិតចំនួន ៨៩ ៨៧៨នាក់ ​ហើយសិក្ខាកាម សិស្ស និស្សិតដែលបានបញ្ចប់ការសិក្សា ទទួលបានការងារធ្វើស្ទើទាំងអស់ ដោយទទួលបានប្រាក់ឈ្នួល​សមរម្យច្រើនជាងកម្មករ​និយោជិតដែលមិនមានជំនាញ។ ទន្ទឹមនោះ សិក្ខាកាមមួយចំនួនក៏មានលទ្ធភាពបង្កើតមុខរបរដោយខ្លួនឯងប្រកបដោយជោគជ័យ រួមចំណែកបង្កើតការងារបន្ថែម។

រាជរដ្ឋាភិបាល ក៏បានត្រៀមរៀបចំផែនការបណ្តុះបណ្តាលជំនាញ​បច្ចេកទេស ​និងវិជ្ជាជីវៈ ដល់យុវជន​នៅគ្រួសារក្រីក្រ​ និងងាយរងគ្រោះទូទាំងប្រទេសចំនួន​ ១លាន ៥សែននាក់ ដោយរដ្ឋ​ធានាផ្តល់​ប្រាក់​ឧបត្ថម្ភចាប់ពីឆ្នាំ២០២៣​ នេះតទៅ ដើម្បីផ្តល់ឱកាសឱ្យពួកគេមាន​ជំនាញ​សម្រាប់យកទៅធ្វើការងារ ​ឬបង្កើតមុខរបរដោយខ្លួនឯង និងបំពេញតម្រូវការ​នៃកម្លាំង​ពលកម្ម​ជំនាញសម្រាប់ការវិនិយោគថ្មីៗនៅកម្ពុជា៕