នៅពេលអនាគត រូបយន្តដែលមានឈ្មោះថា ErgoCub អាចធ្វើការលើកវត្ថុមានទម្ងន់ធ្ងន់ៗជំនួសមនុស្សបានបាន។ ក្រុមអ្នកវិទ្យាសាស្ត្រនៅវិទ្យាស្ថានអ៊ីតាលីមួយនិយាយថា គោលដៅនៃការបង្កើតរូបយន្តនេះគឺមិនគ្រាន់តែធ្វើឱ្យជីវិតការងាររបស់មនុស្សកាន់តែងាយស្រួលប៉ុណ្ណោះទេ ប៉ុន្តែថែមទាំងការពារមនុស្សពីការរងរបួសផងដែរ។

រូបយន្តនេះមានកម្ពស់ក្រោម ៥ ហ្វីត និងទម្ងន់ ១២៥ ផោន ប៉ុន្តែវាអាចលើកទម្ងន់ធ្ងន់ៗដែលនឹកស្មានមិនដល់។

យោងតាមលោក Giorgio Metta ជាអ្នកវិទ្យាសាស្រ្តមួយរូបនៅវិទ្យាស្ថានបច្ចេកវិទ្យាអ៊ីតាលីបានឲ្យដឹងថា រូបយន្តនេះត្រូវបានបង្កើតឡើងដើម្បីធ្វើការងារធ្ងន់ៗ និងគ្រោះថ្នាក់។

លោក Giorgio Metta និយាយថា "ការបង្កើតរូបយន្តនេះមានរូបរាងដូចមនុស្ស គឺដើម្បីឲ្យវាអាចធ្វើការក្នុងកន្លែងតែមួយ ដែលត្រូវបានរចនាឡើងសម្រាប់មនុស្ស "។

រូបយន្ត ErgoCub អាចធ្វើការនៅក្បែរមនុស្ស ឬអាចដំណើរការពីចម្ងាយពីប្រទេសផ្សេង។ វាអាចមានអារម្មណ៍ដឹងបានថានៅពេលមនុស្សចង់ហុចអ្វីមួយឲ្យ អាចរើសវត្ថុ និងប្រគល់វត្ថុនោះឱ្យមនុស្សវិញផងដែរ។

លោក Giorgio Metta និយាយថា "ទាំងអស់នេះធ្វើឱ្យមនុស្សយន្តកាន់តែមានដំណើរការល្អប្រសើរឡើង ទៅតាមការវិវត្តន៍ ដែលយើងកំពុងរៀបចំផែនការសម្រាប់ម៉ាស៊ីនខ្លាំងជាងមុន ស្វាហាប់ជាងមុន ម៉ូទ័រខ្លាំងជាងមុន ពីព្រោះយើងត្រូវការមនុស្សយន្តដើម្បីជួយសម្រាលការងាររបស់យើង"៕