ប្រភពនានានិយាយថា មន្ត្រីជាន់ខ្ពស់នៃយោធាមីយ៉ាន់ម៉ាទំនងជាបានទៅជួបលោកស្រី អ៊ុងសាន ស៊ូជី នៅក្នុងពន្ធនាគារនៅចុងខែមុន និងដើមខែនេះ។ គេជឿថា មន្ត្រីជាន់​ខ្ពស់នៃយោធាមីយ៉ាន់ម៉ាទាំងនោះកំពុងស្វែងរកការសម្រុះសម្រួលរបស់លោកស្រីដើម្បីបញ្ឈប់ចលនាក្រុមប្រឆាំង ខណៈដែលការប្រយុទ្ធគ្នារវាងរបបសឹកដែលកំពុងកាន់អំណាច និង​កង​កម្លាំង​គាំទ្រលទ្ធិប្រជាធិបតេយ្យមានសន្ធុះកាន់តែខ្លាំងក្លា។

ប្រភពស្និទ្ធនឹងភាគីគាំទ្រលទ្ធិប្រជាធិបតេយ្យបាននិយាយថា មន្ត្រីយោធាបីនាក់ទំនងជាបានជួបមេដឹកនាំដែលត្រូវបានទម្លាក់ពីតំណែងរូបនេះនៅឯពន្ធនាគារក្នុងរដ្ឋធានី Naypyitaw ​កាល​ពីថ្ងៃទី ២៧ ខែឧសភា និងកាលពីថ្ងៃទី ៤ ខែមិថុនា។

តាមសេចក្តីរាយការណ៍បានឲ្យដឹងថា ក្រុមមន្ត្រីទាំងនោះ បានស្នើឱ្យលោកស្រី អ៊ុងសាន ស៊ូជី អំពាវនាវឱ្យកងកម្លាំងការពារប្រជាជន ដែលជាស្លាបប្រយុទ្ធប្រដាប់អាវុធនៃរដ្ឋាភិបាលរួបរួមជាតិនិយមលទ្ធិប្រជាធិបតេយ្យ ដែលកំពុងនិរទេស ឱ្យបញ្ឈប់ការតស៊ូប្រដាប់អាវុធរបស់ខ្លួន បន្ទាប់​ពីបានពន្យល់​ពីស្ថាន​ភាព​នៃការ​ប្រយុទ្ធនេះ។ គេជឿថា លោកស្រីបានច្រានចោលការសហការជាមួយយោធា។ប្រព័ន្ធផ្សព្វផ្សាយ​ក្នុងស្រុកជា​ច្រើនបាន​រាយការណ៍​អំពីដំណើរ​ចូលជួបលោកស្រី អ៊ុងសាន ស៊ូជី ដោយក្រុមមន្ត្រីយោធា។

អ្នកនាំពាក្យយោធាបានប្រាប់សារព័ត៌មាន NHK ថាមិនមានដំណើរចុះជួបបែបនេះកើតឡើងទេ ហើយបានចោទប្រកាន់ប្រព័ន្ធផ្សព្វផ្សាយក្នុងស្រុកថាបានផ្សព្វផ្សាយព័ត៌មានមិនពិត។

លោកស្រី អ៊ុងសាន ស៊ូជី ត្រូវបានឃុំខ្លួនកាលរដ្ឋប្រហារឆ្នាំ ២០២១ ដែលរបបយោធាបានដណ្តើមអំណាច។ ពេលនេះលោកស្រីកំពុងជាប់ពន្ធនាគារ បន្ទាប់ពីត្រូវបានកាត់ទោសឲ្យជាប់ពន្ធនាគាររយៈពេល៣៣ឆ្នាំក្នុងសាលក្រមដែលលោកស្រីមានទោសចំនួន ១៩ ករណី៕