​ភ្នំពេញ៖ ប្រជាជនចិន តាមរយៈមូលនិធិចិនដើម្បីអភិវឌ្ឍន៍ជនបទ បានផ្ដល់សម្ភារសិក្សា និងរបស់ប្រើប្រាស់ចំនួនជាង៥ពាន់កញ្ចប់ផេនដា ផ្ដល់ទៅដល់សិស្សានុសិស្ស តាមសាលា​បឋម​សិក្សា​ចំនួន១១ នៅក្នុងខណ្ឌជ្រោយចង្វារ ដែលកម្មភាពនេះ បានបង្ហាញពីការចូលរួមចំណែកលើកស្ទួយ និងអភិវឌ្ឍន៍វិស័យអប់រំនៅកម្ពុជា។

ក្នុងពិធីប្រគល់ និងទទួលអំណោយទាំង៥៣៦២កញ្ចប់ នាថ្ងៃទី១៥ ខែមិថុនា ឆ្នាំ២០២៣ ឯកឧត្តម អ៊ុ សារឹទ្ធ អគ្គលេខាធិការព្រឹទ្ធសភា មានប្រសាសន៍ថា ការងារអប់រំជា​កិច្ចការ​អាទិភាព​មួយ​របស់រាជរដ្ឋាភិបាលកម្ពុជា ដើម្បីសម្រេចផែនការអភិវឌ្ឍន៍ ជំរុញឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍន៍នៅឆ្នាំ២០៥០ ហើយ​ការបង្កើន​ធនធានមនុស្សឱ្យមានសក្តានុពលខ្ពស់ ជារឿងមិនអាចរំលងបានឡើយ។

ឯកឧត្តមបានបន្តថា សម្ភារសិក្សា និងរបស់ប្រើប្រាស់ប្រគល់ទៅកាន់កុមារ ដែលជាសិស្សានុសិស្សទាំងអស់នេះជាកញ្ចប់នៃក្តីស្រឡាញ់ ដែលជាការគិតគូដោយប្រមុខរដ្ឋាភិបាល នៃប្រទេសកម្ពុជា និងចិន ហើយនឹងក្លាយជាចំណែកមួយបន្ថែមទៀត ក្នុងការពង្រឹងវិស័យអប់រំនៅកម្ពុជា ។

លោក ស៊ុន សុខុម នាយកសាលាបឋមសិក្សាជ្រោយចង្វារ លើកឡើងថា សម្ភារសិក្សា និងរបស់ប្រើប្រាស់ទាំងអស់នេះ ក៏បានចូលរួមចំណែកផងដែរ ដល់ការចំណាយរបស់មាតាបិតា អាណាព្យាបាលសិស្ស ដែលមានការខ្វះខាត និងជំរុញទឹកចិត្តសិស្សឲ្យកាន់តែខិតខំរៀនសូត្របន្តទៀត ។

​សម្រាប់សិស្សានុសិស្ស ទទួលបានសម្ភារសិក្សាថ្មី បានបង្ហាញនូវការសប្បាយរីករាយ ចំពោះការយកចិត្តទុកដាក់លើការសិក្សារបស់ពួកគេ ពីសំណាក់អាជ្ញាធរ ក៏ដូចជាដៃគូផ្សេងៗ ហើយពួកគេក៏បានប្ដេជ្ញាចិត្ត ខិតខំរៀនឲ្យក្លាយជាសិស្សល្អ និងសម្រេចគោលដៅជីវិត ។

លោក WANG HAOYU តំណាងមូលនិធិចិនដើម្បីអភិវឌ្ឍជនបទ បានឲ្យដឹងថា កម្ពុជាគឺក្នុងចំណោមប្រទេសចំនួន១៤ ក្នុងប្រទេសអាស៊ី និងអាហ្វ្រិក ដែលទទួលបាននូវកញ្ចប់ផេនដានេះ សរុបចំនួនជាង ១.១៥លានកញ្ចប់ ខណៈនៅកម្ពុជារហូតមកដល់ពេលនេះ បានប្រគល់ជូនមាន ១៧ម៉ឺនកញ្ចប់ហើយ ៕ អត្ថបទ បាន សុខរិទ្ធិ