ក្រសួងការបរទេស​ចិន​បាន​និយាយ​នៅ​ថ្ងៃ​ព្រហស្បតិ៍ (១៥ មិថុនា​)​នេះ​ថា កង​នាវា​របស់​ប្រទេស​ចិន​ប្រើប្រាស់​សិទ្ធិ​នៃ​សេរីភាព​ក្នុង​ការធ្វើ​នាវាចរណ៍ និង​ការស្រាវជ្រាវ​វិទ្យាសាស្ត្រ​ស្របតាម​ច្បាប់​។​

​លោក Wang Wenbin អ្នកនាំពាក្យ​ក្រសួងការបរទេស បាន​និយាយ​ឆ្លើយតប​នឹង​សំណួរ​ទាក់ទង​នឹង​ប្រទេស​កោះ Palau (​ប៉ា​ឡាវ​) ដែល​ស្នើសុំ​ការ​ល្បាត​បន្ថែម​ពី​សហរដ្ឋអាមេរិក បន្ទាប់ពី​មានការ​ជ្រៀតចូល​ថ្មីៗ​ជាច្រើន​ដងដោយ​កង​នាវា​ចិន​។​

​លោក​ប្រធានាធិបតី Surangel Whipps Jr បាន​ប្រាប់​សារព័ត៌មាន រ៉​យ​ទ័​រ ក្នុង​បទសម្ភាសន៍​មួយ​ថា ប្រទេស​កោះ​ប៉ាស៊ីហ្វិក Palau បានស្នើ​ឱ្យ​សហរដ្ឋអាមេរិក​បង្កើន​ការ​ល្បាត​ដែនទឹក​របស់ខ្លួន​បន្ទា​ប់​ពី​ការ​ជ្រៀតចូល​ថ្មីៗ​ជាច្រើន​ដងដោយ​កង​នាវា​ចិន​ចូលទៅក្នុង​តំបន់សេដ្ឋកិច្ចផ្តាច់មុខ​របស់ខ្លួន​។​

​លោក Whips Jr. បាន​និយាយថា លោក​ក៏​នឹង​ស្វាគមន៍​វត្តមាន​យោធា​អាមេរិក​កាន់តែច្រើន​នៅក្នុង​ប្រទេស​នេះ ដោយមាន​កងទ័ព​ឈរជើង​ជាមួយ​ឆ្មាំ​ល្បាត​ឆ្នេរ​ដែលមាន​ស្រាប់ និង​ក្រុមការងារ​សកម្ម​ស៊ីវិល ខណៈដែល​ទីក្រុង​វ៉ាស៊ីនតោន និង​ទីក្រុង​ប៉េកាំង​ប្រកួតប្រជែង​ដណ្តើម​ឥទ្ធិពល​នៅក្នុង​តំបន់​យុទ្ធសាស្ត្រ​មួយ​នេះ​៕​