ការតវ៉ានានាបានបន្តនៅភាគខាងជើងប្រទេសកូសូវ៉ូកាលពីថ្ងៃពុធ (១៤ មិថុនា) មួយថ្ងៃបន្ទាប់ពីការចាប់ខ្លួនជនជាតិស៊ែរប៊ីនិងគ្រូបង្វឹកប្រដាល់សេរីលោក Milun Milenkovic ។

កាល​ពីថ្ងៃអង្គារ (១៣ មិថុនា) រដ្ឋមន្ត្រីក្រសួងមហាផ្ទៃកូសូវ៉ូជនជាតិអាល់បានី បានកំណត់អត្តសញ្ញាណលោក Milenkovic ថាជាអ្នករៀបចំការវាយ​ប្រហារលើកងកម្លាំង​រក្សា​សន្តិភាព​របស់​អង្គការណាតូក្នុងអំឡុងពេលចលាចលរបស់ជនជាតិស៊ែរប៊ីកាលពីខែមុន ដែលបានជំរុញឱ្យមានការខឹងសម្បារជាថ្មីនៅក្នុងតំបន់ដែលងាយនឹងបង្កភាពវឹកវរនេះ។

ជនជាតិស៊ែរប៊ីប្រហែល ២.០០០ នាក់ ដោយភាគច្រើនមកពីសហគមន៍ប្រដាល់សេរីក្នុងស្រុកបានប្រមូលផ្តុំគ្នានៅតំបន់ North Mitrovica ដើម្បីតវ៉ាប្រឆាំងនឹងការចាប់ខ្លួនរបស់លោក Milenkovic ដោយមាននគរបាលកូសូវ៉ូជាជាតិអាល់បានីក្នុងឈុតឧបករណ៍ប្រឆាំងកុបកម្មឈរនៅចម្ងាយពីរបីរយម៉ែត្រ។

រដ្ឋមន្ត្រីក្រសួងមហាផ្ទៃលោក Xhelal Svecla បាននិយាយនៅលើគេហទំព័របណ្ដាញសង្គម ហ្វេសប៊ុក របស់ខ្លួនថា ក្នុងអំឡុងពេលប្រតិបត្តិការដើម្បីចាប់ខ្លួនលោក Milun Milenkovic មាននគរបាលកូសូវ៉ូជនជាតិអាល់បានី ៣ នាក់បានរងរបួសស្រាល។

កងកម្លាំងរក្សាសន្តិភាព៣០នាក់ និងជនជាតិស៊ែរប៊ី ៥២នាក់ បានរងរបួសនៅក្នុងការប៉ះទង្គិចគ្នាកាលពីចុងខែមុន បន្ទាប់ពីអភិបាលក្រុងជនជាតិអាល់បានី បានឡើងកាន់តំណែង​បន្ទាប់​ពី​ការបោះឆ្នោតក្នុងស្រុកមួយ ដែលចំនួនអ្នកទៅបោះឆ្នោតមានត្រឹមតែ ៣,៥% ប៉ុណ្ណោះ បន្ទាប់​ពីជនជាតិស៊ែរប៊ីភាគ​ច្រើនដែលរស់នៅក្នុងតំបន់នោះ បានធ្វើពហិការ​មិន​ចូលរួម​ការបោះឆ្នោត៕