ភ្នំពេញ៖ សាលារាជធានីភ្នំពេញសម្រេចបន្តបែងចែកភូមិសាស្ត្ររបស់ខ្លួនទៅជា ៣តំបន់រយៈពេល ១សប្ដាហ៍ទៀត ដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩។
ក្នុងសេចក្ដីសម្រេចនៅថ្ងៃនេះ អភិបាលរាជធានីភ្នំពេញ លោក ឃួង ស្រេង បានបន្តបែងចែកភូមិសាស្ត្ររាជធានីភ្នំពេញ ជា«តំបន់ក្រហម» ដែលសំដៅដល់តំបន់កំពុងប្រឈមមុខនឹងការឆ្លងរីករាលដាលខ្លាំងនៃមេរោគកូវីដ១៩ «តំបន់លឿងទុំ» សំដៅដល់តំបន់កំពុងប្រឈមមុខនឹងការឆ្លងរីករាលដាលកម្រិតមធ្យមនៃមេរោគកូវីដ១៩ និង«តំបន់លឿង» ដែលសំដៅដល់តំបន់មានការឆ្លងរីករាលដាលកម្រិតស្រាល។
បើតាមការបែងចែកថ្មីនេះ ខណ្ឌចំនួន ៦ នៅក្នុងចំណោមខណ្ឌទាំង ១៤របស់រាជធានីភ្នំពេញ ត្រូវបានកែប្រែទៅជាតំបន់លឿងអស់ហើយ ខណៈភូមិសាស្ត្រមួយចំនួននៃខណ្ឌដង្កោ ខណ្ឌកំបូល ខណ្ឌ៧មករា និងខណ្ឌច្បារអំពៅ នៅសេសសល់«តំបន់លឿងទុំ» និង«តំបន់ក្រហម»មួយចំនួន។
ចំណែកឯខណ្ឌទួលគោកនៅសល់តំបន់ក្រហមចំនួន ២ភូមិ តំបន់លឿងចំនួន ៣ភូមិ ហើយខណ្ឌពោធិ៍សែនជ័យ នៅសេសសល់តំបន់ក្រហមចំនួន ២ភូមិ និងតំបន់លឿងទុំចំនួន ៤ភូមិ ខណៈដែលខណ្ឌឫស្សីកែវ នៅសល់តំបន់ក្រហមចំនួននៅតាមផ្នែកខ្លះនៃភូមិចំនួន ៣ និងតំបន់លឿងទុំនៅផ្នែកខ្លះនៃភូមិចំនួន ៥។
សម្រាប់ខណ្ឌមានជ័យវិញ ដែលជាខណ្ឌកំពុងប្រឈមមុខនឹងការឆ្លងរីករាលដាលខ្លាំងនៃមេរោគកូវីដ១៩នោះ សាលារាជធានីបានកំណត់ផ្នែកខ្លះនៃភូមិចំនួន ៤ ឱ្យនៅជាតំបន់ក្រហមនៅឡើយ ហើយផ្នែកខ្លះនៃភូមិចំនួន ៥ ត្រូវបានដាក់ជាតំបន់លឿងទុំ។
ភូមិសាស្ត្ររាជធានីភ្នំពេញបានមើលកំណើននៃការឆ្លងមេរោគកូវីដ១៩ចំនួនច្រើនអស់រយៈពេលជាច្រើនសប្ដាហ៍ហើយ ដែលបង្ខំឱ្យរដ្ឋាភិបាលសម្រេចបិទខ្ទប់អស់រយៈពេល ៣សប្ដាហ៍ចាប់ពីថ្ងៃទី១៥ ខែមេសា រហូតដល់ថ្ងៃទី០5 ខែឧសភាកន្លងមកនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
