​បាល់ទាត់៖ ​Manchester City បាន​ក្លាយ​ជា​ជើងឯក​ក្រប​ខណ្ឌ English Premier League ជា​លើក​ទី​៣ ក្នុង ៤​រដូវ​កាល​ចុងក្រោយ បន្ទាប់ពី​ក្រុម​គូប្រជែង Manchester United ចាញ់ Leicester City ក្នុង​ទឹកដី​ខ្លួនឯង ២-១ យប់មិញ​។​

​​ក្រុម​របស់​លោក Pep Guardiola នៅ​ពេល​នេះ​មាន ១០ពិន្ទុ​ពីលើ​ក្រុម​លេខ២ Manchester United ខណៈ​នៅសល់​តែ ៣ប្រកួត​ទៀត​ចប់​រដូវ​កាល​។ ​អ្នកចាត់ការ​វ័យ ៥០ឆ្នាំ Pep Guardiola នៅ​ពេល​នេះ​ឈ្នះ​ពាន​ក្នុងស្រុក​ចំនួន ៨ ហើយ​តាំងពី​មក​ដឹកនាំ Manchester City នៅ​ឆ្នាំ២០១៦​។ Manchester City នឹង​អាច​លើក​ពាន​នៅ​ចំពោះ​មុខ​អ្នកគាំទ្រ​បាន ​នៅ​ពេល​ជួប Everton នៅ Etihad នៅ​ថ្ងៃ​ទី​២៣ ខែ​ឧសភា​នេះ​ដែល​ជា​សប្តាហ៍​ចុងក្រោយ​នៃ​ក្រប​ខណ្ឌ English Premier League បន្ទាប់ពី​រដ្ឋាភិបាល​អ​ង់​គ្លេ​ស​បាន អនុញ្ញាត​អោយ​អ្នកគាំទ្រ​ចូល​ទស្សនា​ផ្ទាល់​វិញ​ ២​សប្ដាហ៍​ចុងក្រោយ ​តែ​ក្នុង​ចំនួន​កំណត់​តែ​អ្នកគាំទ្រ​ក្រុម​ម្ចាស់ផ្ទះ​។​

​​នេះ​ជា​លើក​ទី៦ ហើយ​ដែល​ជើងឯក English Premier League ត្រូវ​សំរេច​ដោយ​ការប្រកួត​នៅ​ទឹកដី Old Trafford ក្នុង​ជ័យជំនះ​របស់ Leicester លើ Manchester United​។​ ​ក្រុម​របស់​លោក Ole Gunnar Solskjaer​ ដែល​ត្រូវ​លេង ៤​ប្រកួត​ក្នុង​មួយ​សប្ដាហ៍​នោះ​បាន​ផ្លាស់ប្ដូរ​ជំរើស ១១​នាក់​ជាច្រើន​យប់មិញ​។ ​Leicester City បាន​ស្គាល់​ជ័យជំនះ​ដំបូង​នៅ Old Trafford គិត​តាំងពី​ឆ្នាំ១៩៩៨ បន្ទាប់ពី​គ្រាប់​បាល់​ជ័យជំនះ​របស់ Soyuncu​ នៅ​នាទី​ទី​៦៦​។ ​ជ័យជំនះ​ក៏បាន​ពង្រឹង​កៅអី Top4 របស់ Leicester City ផង​ដែរ​ដោយ​កំពុង​ឈរ​លេខ៣ មាន ៦៦ពិន្ទុ​ដេញ​ពីក្រោយ​ដោយ Chelsea មាន ៦៤​ពិន្ទុ​ ខណៈ​លេខ៥ គឺ West Ham មាន ៥៨ពិន្ទុ​៕

​អត្ថបទ​៖​នាង សុភា​វុ​ធ