ភ្នំពេញ៖ ក្រសួងសុខាភិបាល បានរៀបចំពិធីប្រគល់-ទទួល សម្ភារវេជ្ជសាស្រ្ត ជូនដល់មូលដ្ឋានសុខាភិបាលទូទាំងប្រទេស នៅឃ្លាំងឱសថកណ្តាល (Central Medical Stores) នៅព្រឹកថ្ងៃទី១៦ ខែមិថុនា ឆ្នាំ២០២៣នេះ ។

ពិធីប្រគល់-ទទួលខាងលើនេះ ស្ថិតក្រោមវត្តមានលោកជំទាវវជ្ជបណ្ឌិត យក់ សម្បត្តិ រដ្ឋលេខាធិការប្រចាំការ ក្រសួងសុខាភិបាល និងជានាយកគម្រោងមូលនិធិសកល សម្រាប់កម្មវិធីប្រយុទ្ធនឹងជំងឺអេដស៍ របេង គ្រុនចាញ់ កម្មវិធីពង្រឹងប្រព័ន្ធសុខាភិបាល ប្រកបដោយនិរន្តរភាព និងគម្រោងឆ្លើយតបនឹងជំងឺកូវីដ-១៩ ដោយមានការចូលរួមពីឯកឧត្តម លោកជំទាវ លោក លោកស្រី ថ្នាក់ដឹកនាំ នៃអគ្គនាយកដ្ឋានទាំង២ នាយកដ្ឋានពាក់ព័ន្ធ មន្ទីរពេទ្យជាតិ អង្គភាពថ្នាក់កណ្ដាលពាក់ព័ន្ធ និងមន្ទីរសុខាភិបាលរាជធានី-ខេត្តទាំង២៥។ សម្ភារវេជ្ជសាស្ត្រដែលចែកជូនមូលដ្ឋានសុខាភិបាលសាធារណៈទូទាំងប្រទេសនាថ្ងៃនេះ រួមមាន៖ 1)Sensor for handheld pulse oximeter, 2)Patient Monitor sensor adult, 3) Patient Monitor sensor Pediatric, 4) Patient Monitor sensor pediatric (extension wire) and 5) Skid-mounted booster compressor គិតជាទឹកប្រាក់ចំនួន 371,238 ដុល្លាអាមេរិក ដែលជាជំនួយឥតសំណងរបស់មូលនិធិសកល សម្រាប់រយៈពេល៣ឆ្នាំ (២០២១-២០២៣) ក្រោមគម្រោងឆ្លើយតប នឹងជំងឺកូវីដ-១៩ បន្ថែមពីលើថវិកាសម្រាប់កម្មវិធីប្រយុទ្ធ នឹងជំងឺអេដស៍ របេង គ្រុនចាញ់ និងកម្មវិធីពង្រឹងប្រព័ន្ធ​សុខាភិបាល​ប្រកបដោយនិរន្តរភាព ដែលមានថវិកាសរុបជាង៨៥លានដុល្លារ​អាមេរិក សម្រាប់រយៈពេល៣ឆ្នាំ គឺពីឆ្នាំ២០២១ ដល់ ២០២៣ ដែលត្រូវបានផ្ដល់ជូន​តាមរយៈក្រសួងសេដ្ឋកិច្ច និង ហិរញ្ញវត្ថុ។

ឆ្លៀតក្នុងឱកាសនោះ លោកជំទាវវេជ្ជបណ្ឌិត យក់ សម្បតិ្ត រដ្ឋលេខាធិការប្រចាំការ បានបញ្ជាក់ថា ជោគជ័យនៃការគ្រប់គ្រង ទប់ស្កាត់ ការរីករាលដាលជំងឺកូវីដ-១៩ នៅកម្ពុជា ក្នុងរយៈពេលជាង​៣ឆ្នាំកន្លងមកនេះ កើតឡើងពីការដឹកនាំដ៏ឈ្លាសវៃប្រកបដោយ​គតិបណ្ឌិតរបស់​សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាអគ្គមេបញ្ជាការដឹកនាំចង្អុលបង្ហាញផ្ទាល់។

លោកជំទាវរដ្ឋលេខាធិការប្រចាំការ ក៏បានថ្លែងអំណរគុណដល់មូលនិធិសកល ដែល​បានសហការគាំទ្រទាំងថវិកា និងបច្ចេកទេស ដល់វិស័យសុខាភិបាលនាពេលកន្លងមក។ លោកជំទាវរដ្ឋលេខាធិការប្រចាំការ ​ក៏បានសម្តែងនូវការកោតសរសើរ និងជូនពរដល់​មន្ត្រីសុខាភិបាលគ្រប់ លំដាប់ថ្នាក់ ដែលបានខិតខំប្រឹងប្រែងអស់ពីសមត្ថភាព ប្រកាន់ខ្ជាប់ក្រមសីលធម៌វិជ្ជាជីវៈ ក្នុងការផ្តល់សេវាជូនប្រជាពលរដ្ឋប្រកបដោយស្មារតី​ទទួលខុសត្រូវខ្ពស់៕អត្ថបទ រដ្ឋា