ភ្នំពេញ៖ ពលរដ្ឋបានបង្ហាញការសាទរចំពោះសមិទ្ធផលអភិវឌ្ឍន៍ថ្មីៗ ដែលជាស្នាដៃរបស់រាជរដ្ឋាភិបាលដឹកនាំដោយគណបក្សប្រជាជនកម្ពុជា គឺស្ពានខ្សែកាបថ្មីមួយទៀត សម្រាប់ការធ្វើដំណើរឆ្លងកាត់ទន្លេបាក់ តភ្ជាប់កោះពេជ្រ និងកោះនរា ដែលវានឹងជួយ សម្រួលពេលវេលាធ្វើដំណើរ ។
ស្ពានបេតុងខ្សែកាបឆ្លងកាត់ទន្លេបាសាក់ ចេញពីកោះពេជ្រ ភ្ជាប់មកតំបន់កោះនរា មកដល់ពេល នេះ សម្រេចបានប្រមាណ៨០ភាគរយហើយ ដែលគម្រោងសាងសង់នេះ នឹងត្រូវរួចរាល់នៅខែ វិច្ឆិកា ឆ្នាំ២០២៣ ខាងមុខ។ នេះបើតាមការឱ្យដឹងពីលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ។
ជាមួយនឹងសមិទ្ធផលថ្មីនេះ ប្រជាពលរដ្ឋ បានបង្ហាញពីការមើលឃើញរបស់ពួកគេ ចំពោះការរីកចម្រើននាពេលបច្ចុប្បន្នរបស់ ប្រទេសជាតិ ពិសេសរាធានីភ្នំពេញ លើគ្រប់វិស័យ ពិសេសហេដ្ឋារចនាសម្ព័ន្ធតភ្ជាប់ ដែលបានសម្រួលដល់ ការធ្វើដំណើរ និងកាត់បន្ថយការចំណាយរបស់ពលរដ្ឋ ។
តទៅពេលអនាគត ស្ពានថ្មីមួយខ្សែនេះ នឹងដើរតួនាទីសំខាន់ក្នុងការបម្រើដល់ការធ្វើដំណើរ របស់ ពលរដ្ឋ ដោយអាចឆ្លងពីតំបន់កោះនរា ទៅកាន់តំបន់អភិវឌ្ឍន៍កោះពេជ្រ ដែលធ្វើឱ្យរំហូរចរាចរណ៍ នៅភូមិ សាស្ត្រខណ្ឌច្បារអំពៅមានភាពប្រសើរជាងរាល់ថ្ងៃនេះ ដែលមានភាពប្រឈមលើការកកកុញស្ទះចរាចរណ៍ជាប្រចាំថ្ងៃ ពិសេសរៀងរាល់ពេលព្រឹក និងពេលល្ងាច ។
ស្ពានតភ្ជាប់ពីកោះពេជ្រ-កោះនរានេះ ត្រូវបានបើកការដ្ឋានដំណើរការសាងសង់កាលពីខែតុលា ឆ្នាំ២០២០ ដែលស្ពាននេះ មានប្រវែង៨២៤ម៉ែត្រ ទទឹង ២៤,៥០ម៉ែត្រ និងត្រូវចំណាយថវិកា ចំនួន ៣៨លានដុល្លារ ក្នុងការសាងសង់ ៕អត្ថបទ៖ លី ហេង
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
