ចំពេល​អំពើហិង្សា កំពុង​កើតមានឡើង​ជាថ្មី នៅ​រដ្ឋ Manipur លំនៅឋាន​របស់​រដ្ឋមន្ត្រី​សហភាព​លោក R K Ranjan Singh នៅ​ស្រុក Kongba ក្នុង​ទីក្រុង Imphal ត្រូវបាន​ក្រុមមនុស្ស​ដុតបំផ្លាញ កាលពី​យប់​ថ្ងៃ​ព្រហស្បតិ៍ ខណៈ​នៅពេលដែល​កើតហេតុ​នោះ លោក​រដ្ឋមន្ត្រី​មិនបាន​នៅផ្ទះ​ទេ​។​

​ពេល​ផ្ដល់​កិច្ចសម្ភាសន៍​ជាមួយ​ទីភ្នាក់ងារសារព័ត៌មាន ANI លោក Ranjan រដ្ឋមន្ត្រីក្រសួង​សហភាព​ទទួលបន្ទុក​កិច្ចការបរទេស បាន​ប្រាប់ថា​៖ «​បច្ចុប្បន្ន ខ្ញុំ​កំពុង​នៅ​រដ្ឋ Kerala ដើម្បី​បំពេញការងារ​ផ្លូវការ​។ សំណាងល្អ​ណាស់ យប់មិញ​គ្មាន​អ្នកណា​រងរបួស​នោះទេ ក្នុងផ្ទះ​របស់ខ្ញុំ នា​ក្រុង Imphal នោះ​។ ជនខិលខូច​បានមក​ដល់ផ្ទះ​របស់ខ្ញុំ​ដោយមាន​ដប​គ្រាប់បែក​ភ្លើង ហើយ​ធ្វើការ​បំផ្លិចបំផ្លាញ​នៅ​ជាន់​ផ្ទាល់​ដី និង​ជាន់​ទីមួយ​»​។​

​រដ្ឋ Manipur បាននិងកំពុង​ជួបប្រទះ​នូវ​ប៉ះទង្គិច​គ្នា​យ៉ាង​ហិង្សា រវាង​ក្រុម​ពីរ គឺ​ម៉ី​តី (Meiteis) និង​គូ​គី (Kukis) ជុំវិញ​ការទាមទារ​ឲ្យ​មានការ​បញ្ចូល​ក្រុម​កុលសម្ព័ន្ធ​ឋានៈ​បម្រុង​ទៅក្នុង​រដ្ឋធម្មនុញ្ញ​ជាតិ (ST) ចាប់តាំងពី​ថ្ងៃទី​៣ ខែឧសភា ដែល​បណ្តាល​ឲ្យ​មនុស្ស​ជាង ១០០​នាក់ បាន​ស្លាប់​៕​