​

​កំពង់ស្ពឺ​៖ សម្តេច​តេ​ជោ ហ៊ុន សែន នាយករដ្ឋមន្ត្រី បាន​អះអាង​ជាថ្មី​ម្តង​ទៀតថា ការដែល​សម្តេច​ចុះ​ជួប​សំណេះសំណាល​ជាមួយ​បងប្អូន​កម្មករ​-​កម្មការិនី នាពេល​កន្លងមក ក៏ដូចជា​ពេលនេះ មិនមែន​ជាការ​ជិះសេះ​មើល​ផ្កា​នោះទេ គឺជា​ការជួបជុំ​ដើម្បី​ស្វែងរក​ដំណោះស្រាយ​ជូន​ដល់​បងប្អូន​កម្មករ​-​កម្មការិនី និង​ចង់ដឹង​អំពី​វឌ្ឍភាព​របស់​កម្មក​និយោជិត​ នៅតាម​រោងចក្រ​។​

​ក្នុងឱកាស​បន្ត​អញ្ជើញ​ចុះ​ជួប​សំណេះសំណាល​ជាមួយ​កម្មករ និយោជិត ១៨.០១២​នាក់ មកពី​រោងចក្រ​សហគ្រាស​ចំនួន​៧ ដែល​កំពុងដំណើរការ​អាជីវកម្ម​ក្នុងស្រុក​សំរោង​ទង និង​ស្រុក​គងពិសី ខេត្ត​កំពង់ ស្ពឺ នៅ​ព្រឹក​ថ្ងៃទី​១៧ ខែមិថុនា ឆ្នាំ​២០២៣​នេះ​សម្តេច​តេ​ជោ ហ៊ុន សែន បាន​បញ្ជាក់ថា សម្តេច បាន​ជួប​សំណេះសំណាល​ជាមួយ​បងប្អូន​កម្មករ​តាំងពីដើម រហូតដល់​សព្វថ្ងៃនេះ គឺ​បា​នរក​ដំណោះស្រាយ​ជូន​ដល់​បងប្អូន​កម្មករនិយោជិត​បាន​ច្រើន ដូចជា​៖ ការសម្របសម្រួល​ឲ្យ​កម្មការិនី ដែលមាន​ផ្ទៃពោះ និង​ពិការភាព​ចេញ​មុន​ម៉ោង​ធ្វើការ និង​បញ្ហា​មួយចំនួនទៀត ​ដែល​រាជរដ្ឋាភិបាល​ធ្វើការ​សម្របសម្រួល និង​កំពុង​រក​ដំណោះស្រាយ ខណៈ​មានការ​វិវាទ​រវាង​ក​ម្មករ និង​ថៅកែ​រោងចក្រ​ជាដើម​។​

​នៅ​ចំពោះមុខ​បងប្អូន​កម្មករ​-​កម្មការិនី​នៅ​ខេត្តកំពង់ស្ពឺ​នា​ព្រឹក​នេះដែរ សម្តេច​តេ​ជោ ហ៊ុន សែន នាយករដ្ឋមន្ត្រី ក៏បាន​រំលឹក​ជាថ្មីទៀត​ដែរ​ថា កម្មការិនី​ណា​ដែលមាន​ផ្ទៃពោះ​ត្រូវបាន​រាជរដ្ឋាភិបាល​ឧបត្ថម្ភ​បន្ថែម​ជាច្រើន​ដំណាក់កាល​ទៀត ពោលគឺ​ចាប់ផ្តើម​ពី​មាន​ផ្ទៃពោះ​ដំបូង​រហូតដល់​បង្កើត​កូន​បាន​រយៈពេល​ពីរ​ខែ ខណៈ​ស្ត្រី​ដែលមាន​កូនភ្លោះ​ពីរ ឬក៏​បី នឹង​ទទួលបាន​លើស​អ្នក​មានកូន​មួយ​ធម្មតា​៕ អត្ថបទ​៖ បាន ចក់​